Job 20

20¹Respondens autem Sophar Naamathites, dixit:

²Idcirco cogitationes meæ variæ succedunt sibi,

et mens in diversa rapitur.

³Doctrinam qua me arguis audiam,

et spiritus intelligentiæ meæ respondebit mihi.

⁴Hoc scio a principio,

ex quo positus est homo super terram,

⁵quod laus impiorum brevis sit,

et gaudium hypocritæ ad instar puncti.

⁶Si ascenderit usque ad cælum superbia ejus,

et caput ejus nubes tetigerit,

⁷quasi sterquilinium in fine perdetur,

et qui eum viderant, dicent: Ubi est?

⁸Velut somnium avolans non invenietur:

transiet sicut visio nocturna.

⁹Oculus qui eum viderat non videbit,

neque ultra intuebitur eum locus suus.

¹⁰Filii ejus atterentur egestate,

et manus illius reddent ei dolorem suum.

¹¹Ossa ejus implebuntur vitiis adolescentiæ ejus,

et cum eo in pulvere dormient.

¹²Cum enim dulce fuerit in ore ejus malum,

abscondet illud sub lingua sua.

¹³Parcet illi, et non derelinquet illud,

et celabit in gutture suo.

¹⁴Panis ejus in utero illius

vertetur in fel aspidum intrinsecus.

¹⁵Divitias quas devoravit evomet,

et de ventre illius extrahet eas Deus.

¹⁶Caput aspidum suget,

et occidet eum lingua viperæ.

¹⁷(Non videat rivulos fluminis,

torrentes mellis et butyri.)

¹⁸Luet quæ fecit omnia, nec tamen consumetur:

juxta multitudinem adinventionum suarum, sic et sustinebit.

¹⁹Quoniam confringens nudavit pauperes:

domum rapuit, et non ædificavit eam.

²⁰Nec est satiatus venter ejus:

et cum habuerit quæ concupierat, possidere non poterit.

²¹Non remansit de cibo ejus,

et propterea nihil permanebit de bonis ejus.

²²Cum satiatus fuerit, arctabitur:

æstuabit, et omnis dolor irruet super eum.

²³Utinam impleatur venter ejus,

ut emittat in eum iram furoris sui,

et pluat super illum bellum suum.

²⁴Fugiet arma ferrea,

et irruet in arcum æreum.

²⁵Eductus, et egrediens de vagina sua,

et fulgurans in amaritudine sua:

vadent et venient super eum horribiles.

²⁶Omnes tenebræ absconditæ sunt in occultis ejus;

devorabit eum ignis qui non succenditur:

affligetur relictus in tabernaculo suo.

²⁷Revelabunt cæli iniquitatem ejus,

et terra consurget adversus eum.

²⁸Apertum erit germen domus illius:

detrahetur in die furoris Dei.

²⁹Hæc est pars hominis impii a Deo,

et hæreditas verborum ejus a Domino.