Psalm 47

¹Psalmus cantici. Filiis Core, secunda sabbati.

²Magnus Dominus et laudabilis nimis,

in civitate Dei nostri, in monte sancto ejus.

³Fundatur exsultatione universæ terræ mons Sion;

latera aquilonis, civitas regis magni.

⁴Deus in domibus ejus cognoscetur

cum suscipiet eam.

⁵Quoniam ecce reges terræ congregati sunt;

convenerunt in unum.

⁶Ipsi videntes, sic admirati sunt,

conturbati sunt, commoti sunt.

⁷Tremor apprehendit eos;

ibi dolores ut parturientis:

⁸in spiritu vehementi conteres naves Tharsis.

⁹Sicut audivimus, sic vidimus,

in civitate Domini virtutum, in civitate Dei nostri:

Deus fundavit eam in æternum.

¹⁰Suscepimus, Deus, misericordiam tuam

in medio templi tui.

¹¹Secundum nomen tuum, Deus,

sic et laus tua in fines terræ;

justitia plena est dextera tua.

¹²Lætetur mons Sion,

et exsultent filiæ Judæ,

propter judicia tua, Domine.

¹³Circumdate Sion, et complectimini eam;

narrate in turribus ejus.

¹⁴Ponite corda vestra in virtute ejus,

et distribuite domos ejus, ut enarretis in progenie altera.

¹⁵Quoniam hic est Deus,

Deus noster in æternum, et in sæculum sæculi:

ipse reget nos in sæcula.