Psalm 101:4–12

⁴Quia defecerunt sicut fumus dies mei,

et ossa mea sicut cremium aruerunt.

⁵Percussus sum ut fœnum, et aruit cor meum,

quia oblitus sum comedere panem meum.

⁶A voce gemitus mei

adhæsit os meum carni meæ.

⁷Similis factus sum pellicano solitudinis;

factus sum sicut nycticorax in domicilio.

⁸Vigilavi, et factus sum sicut passer solitarius in tecto.

⁹Tota die exprobrabant mihi inimici mei,

et qui laudabant me adversum me jurabant:

¹⁰quia cinerem tamquam panem manducabam,

et potum meum cum fletu miscebam,

¹¹a facie iræ et indignationis tuæ:

quia elevans allisisti me.

¹²Dies mei sicut umbra declinaverunt,

et ego sicut fœnum arui.