Psalm 65

¹In finem. Canticum psalmi resurrectionis.

Jubilate Deo, omnis terra;

²psalmum dicite nomini ejus;

date gloriam laudi ejus.

³Dicite Deo: Quam terribilia sunt opera tua, Domine!

in multitudine virtutis tuæ mentientur tibi inimici tui.

⁴Omnis terra adoret te, et psallat tibi;

psalmum dicat nomini tuo.

⁵Venite, et videte opera Dei:

terribilis in consiliis super filios hominum.

⁶Qui convertit mare in aridam;

in flumine pertransibunt pede:

ibi lætabimur in ipso.

⁷Qui dominatur in virtute sua in æternum;

oculi ejus super gentes respiciunt:

qui exasperant non exaltentur in semetipsis.

⁸Benedicite, gentes, Deum nostrum,

et auditam facite vocem laudis ejus:

⁹qui posuit animam meam ad vitam,

et non dedit in commotionem pedes meos.

¹⁰Quoniam probasti nos, Deus;

igne nos examinasti, sicut examinatur argentum.

¹¹Induxisti nos in laqueum;

posuisti tribulationes in dorso nostro;

¹²imposuisti homines super capita nostra.

Transivimus per ignem et aquam,

et eduxisti nos in refrigerium.

¹³Introibo in domum tuam in holocaustis;

reddam tibi vota mea ¹⁴quæ distinxerunt labia mea:

et locutum est os meum in tribulatione mea.

¹⁵Holocausta medullata offeram tibi, cum incenso arietum;

offeram tibi boves cum hircis.

¹⁶Venite, audite, et narrabo, omnes qui timetis Deum,

quanta fecit animæ meæ.

¹⁷Ad ipsum ore meo clamavi,

et exaltavi sub lingua mea.

¹⁸Iniquitatem si aspexi in corde meo,

non exaudiet Dominus.

¹⁹Propterea exaudivit Deus,

et attendit voci deprecationis meæ.

²⁰Benedictus Deus, qui non amovit orationem meam,

et misericordiam suam a me.