²Joannes autem cum audisset in vinculis opera Christi, mittens duos de discipulis suis, ³ait illi: Tu es, qui venturus es, an alium exspectamus? ⁴Et respondens Jesus ait illis: Euntes renuntiate Joanni quæ audistis, et vidistis. ⁵Cæci vident, claudi ambulant, leprosi mundantur, surdi audiunt, mortui resurgunt, pauperes evangelizantur: ⁶et beatus est, qui non fuerit scandalizatus in me.

⁷Illis autem abeuntibus, cœpit Jesus dicere ad turbas de Joanne: Quid existis in desertum videre? arundinem vento agitatam? ⁸Sed quid existis videre? hominem mollibus vestitum? Ecce qui mollibus vestiuntur, in domibus regum sunt. ⁹Sed quid existis videre? prophetam? Etiam dico vobis, et plus quam prophetam. ¹⁰Hic est enim de quo scriptum est: Ecce ego mitto angelum meum ante faciem tuam, qui præparabit viam tuam ante te. ¹¹Amen dico vobis, non surrexit inter natos mulierum major Joanne Baptista: qui autem minor est in regno cælorum, major est illo. ¹²A diebus autem Joannis Baptistæ usque nunc, regnum cælorum vim patitur, et violenti rapiunt illud. ¹³Omnes enim prophetæ et lex usque ad Joannem prophetaverunt: ¹⁴et si vultis recipere, ipse est Elias, qui venturus est. ¹⁵Qui habet aures audiendi, audiat.

¹⁶Cui autem similem æstimabo generationem istam? Similis est pueris sedentibus in foro: qui clamantes coæqualibus ¹⁷dicunt: Cecinimus vobis, et non saltastis: lamentavimus, et non planxistis. ¹⁸Venit enim Joannes neque manducans, neque bibens, et dicunt: Dæmonium habet. ¹⁹Venit Filius hominis manducans, et bibens, et dicunt: Ecce homo vorax, et potator vini, publicanorum et peccatorum amicus. Et justificata est sapientia a filiis suis.

²⁰Tunc cœpit exprobrare civitatibus, in quibus factæ sunt plurimæ virtutes ejus, quia non egissent pœnitentiam: ²¹Væ tibi Corozain, væ tibi Bethsaida: quia, si in Tyro et Sidone factæ essent virtutes quæ factæ sunt in vobis, olim in cilicio et cinere pœnitentiam egissent. ²²Verumtamen dico vobis: Tyro et Sidoni remissius erit in die judicii, quam vobis. ²³Et tu Capharnaum, numquid usque in cælum exaltaberis? usque in infernum descendes, quia si in Sodomis factæ fuissent virtutes quæ factæ sunt in te, forte mansissent usque in hanc diem. ²⁴Verumtamen dico vobis, quia terræ Sodomorum remissius erit in die judicii, quam tibi.

²⁵In illo tempore respondens Jesus dixit: Confiteor tibi, Pater, Domine cæli et terræ, quia abscondisti hæc a sapientibus, et prudentibus, et revelasti ea parvulis. ²⁶Ita Pater: quoniam sic fuit placitum ante te. ²⁷Omnia mihi tradita sunt a Patre meo. Et nemo novit Filium, nisi Pater: neque Patrem quis novit, nisi Filius, et cui voluerit Filius revelare. ²⁸Venite ad me omnes qui laboratis, et onerati estis, et ego reficiam vos. ²⁹Tollite jugum meum super vos, et discite a me, quia mitis sum, et humilis corde: et invenietis requiem animabus vestris. ³⁰Jugum enim meum suave est, et onus meum leve.

12¹In illo tempore abiit Jesus per sata sabbato: discipuli autem ejus esurientes cœperunt vellere spicas, et manducare. ²Pharisæi autem videntes, dixerunt ei: Ecce discipuli tui faciunt quod non licet facere sabbatis. ³At ille dixit eis: Non legistis quid fecerit David, quando esuriit, et qui cum eo erant: ⁴quomodo intravit in domum Dei, et panes propositionis comedit, quos non licebat ei edere, neque his qui cum eo erant, nisi solis sacerdotibus? ⁵aut non legistis in lege quia sabbatis sacerdotes in templo sabbatum violant, et sine crimine sunt? ⁶Dico autem vobis, quia templo major est hic. ⁷Si autem sciretis, quid est: Misericordiam volo, et non sacrificium: numquam condemnassetis innocentes: ⁸dominus enim est Filius hominis etiam sabbati.

⁹Et cum inde transisset, venit in synagogam eorum. ¹⁰Et ecce homo manum habens aridam, et interrogabant eum, dicentes: Si licet sabbatis curare? ut accusarent eum. ¹¹Ipse autem dixit illis: Quis erit ex vobis homo, qui habeat ovem unam, et si ceciderit hæc sabbatis in foveam, nonne tenebit et levabit eam? ¹²Quanto magis melior est homo ove? itaque licet sabbatis benefacere. ¹³Tunc ait homini: Extende manum tuam. Et extendit, et restituta est sanitati sicut altera. ¹⁴Exeuntes autem pharisæi, consilium faciebant adversus eum, quomodo perderent eum. ¹⁵Jesus autem sciens recessit inde: et secuti sunt eum multi, et curavit eos omnes: ¹⁶et præcepit eis ne manifestum eum facerent. ¹⁷Ut adimpleretur quod dictum est per Isaiam prophetam, dicentem:

¹⁸Ecce puer meus, quem elegi, dilectus meus,

in quo bene complacuit animæ meæ.

Ponam spiritum meum super eum,

et judicium gentibus nuntiabit.

¹⁹Non contendet, neque clamabit,

neque audiet aliquis in plateis vocem ejus:

²⁰arundinem quassatam non confringet,

et linum fumigans non extinguet,

donec ejiciat ad victoriam judicium:

²¹et in nomine ejus gentes sperabunt.

²²Tunc oblatus est ei dæmonium habens, cæcus, et mutus, et curavit eum ita ut loqueretur, et videret. ²³Et stupebant omnes turbæ, et dicebant: Numquid hic est filius David? ²⁴Pharisæi autem audientes, dixerunt: Hic non ejicit dæmones nisi in Beelzebub principe dæmoniorum. ²⁵Jesus autem sciens cogitationes eorum, dixit eis: Omne regnum divisum contra se desolabitur: et omnis civitas vel domus divisa contra se, non stabit. ²⁶Et si Satanas Satanam ejicit, adversus se divisus est: quomodo ergo stabit regnum ejus? ²⁷Et si ego in Beelzebub ejicio dæmones, filii vestri in quo ejiciunt? ideo ipsi judices vestri erunt. ²⁸Si autem ego in Spiritu Dei ejicio dæmones, igitur pervenit in vos regnum Dei. ²⁹Aut quomodo potest quisquam intrare in domum fortis, et vasa ejus diripere, nisi prius alligaverit fortem? et tunc domum illius diripiet. ³⁰Qui non est mecum, contra me est; et qui non congregat mecum, spargit. ³¹Ideo dico vobis: Omne peccatum et blasphemia remittetur hominibus, Spiritus autem blasphemia non remittetur. ³²Et quicumque dixerit verbum contra Filium hominis, remittetur ei: qui autem dixerit contra Spiritum Sanctum, non remittetur ei, neque in hoc sæculo, neque in futuro. ³³Aut facite arborem bonam, et fructum ejus bonum: aut facite arborem malam, et fructum ejus malum: siquidem ex fructu arbor agnoscitur. ³⁴Progenies viperarum, quomodo potestis bona loqui, cum sitis mali? ex abundantia enim cordis os loquitur. ³⁵Bonus homo de bono thesauro profert bona: et malus homo de malo thesauro profert mala. ³⁶Dico autem vobis quoniam omne verbum otiosum, quod locuti fuerint homines, reddent rationem de eo in die judicii. ³⁷Ex verbis enim tuis justificaberis et ex verbis tuis condemnaberis.

³⁸Tunc responderunt ei quidam de scribis et pharisæis, dicentes: Magister, volumus a te signum videre. ³⁹Qui respondens ait illis: Generatio mala et adultera signum quærit: et signum non dabitur ei, nisi signum Jonæ prophetæ. ⁴⁰Sicut enim fuit Jonas in ventre ceti tribus diebus, et tribus noctibus, sic erit Filius hominis in corde terræ tribus diebus et tribus noctibus. ⁴¹Viri Ninivitæ surgent in judicio cum generatione ista, et condemnabunt eam: quia pœnitentiam egerunt in prædicatione Jonæ. Et ecce plus quam Jonas hic. ⁴²Regina austri surget in judicio cum generatione ista, et condemnabit eam: quia venit a finibus terræ audire sapientiam Salomonis, et ecce plus quam Salomon hic. ⁴³Cum autem immundus spiritus exierit ab homine, ambulat per loca arida, quærens requiem, et non invenit. ⁴⁴Tunc dicit: Revertar in domum meam, unde exivi. Et veniens invenit eam vacantem, scopis mundatam, et ornatam. ⁴⁵Tunc vadit, et assumit septem alios spiritus secum nequiores se, et intrantes habitant ibi: et fiunt novissima hominis illius pejora prioribus. Sic erit et generationi huic pessimæ.

⁴⁶Adhuc eo loquente ad turbas, ecce mater ejus et fratres stabant foras, quærentes loqui ei. ⁴⁷Dixit autem ei quidam: Ecce mater tua, et fratres tui foris stant quærentes te. ⁴⁸At ipse respondens dicenti sibi, ait: Quæ est mater mea, et qui sunt fratres mei? ⁴⁹Et extendens manum in discipulos suos, dixit: Ecce mater mea, et fratres mei. ⁵⁰Quicumque enim fecerit voluntatem Patris mei, qui in cælis est, ipse meus frater, et soror, et mater est.

Read in Logos

Public Domain