Isaiah 16:6–11

⁶Audivimus superbiam Moab:

superbus est valde;

superbia ejus, et arrogantia ejus, et indignatio ejus

plus quam fortitudo ejus.

⁷Idcirco ululabit Moab ad Moab;

universus ululabit:

his qui lætantur super muros cocti lateris,

loquimini plagas suas.

⁸Quoniam suburbana Hesebon deserta sunt,

et vineam Sabama

domini gentium exciderunt:

flagella ejus usque ad Jazer pervenerunt,

erraverunt in deserto;

propagines ejus relictæ sunt,

transierunt mare.

⁹Super hoc plorabo in fletu Jazer

vineam Sabama;

inebriabo de lacrima mea,

Hesebon et Eleale,

quoniam super vindemiam tuam et super messem tuam

vox calcantium irruit.

¹⁰Et auferetur lætitia et exsultatio de Carmelo,

et in vineis non exsultabit neque jubilabit.

Vinum in torculari non calcabit qui calcare consueverat;

vocem calcantium abstuli.

¹¹Super hoc venter meus ad Moab

quasi cithara sonabit,

et viscera mea ad murum cocti lateris.