Ezekiel 23:36–49

³⁶Et ait Dominus ad me, dicens:

Fili hominis, numquid judicas Oollam et Oolibam,

et annuntias eis scelera earum?

³⁷Quia adulteratæ sunt, et sanguis in manibus earum,

et cum idolis suis fornicatæ sunt:

insuper et filios suos quos genuerunt mihi,

obtulerunt eis ad devorandum.

³⁸Sed et hoc fecerunt mihi:

polluerunt sanctuarium meum in die illa,

et sabbata mea profanaverunt.

³⁹Cumque immolarent filios suos idolis suis,

et ingrederentur sanctuarium meum in die illa ut polluerent illud,

etiam hæc fecerunt in medio domus meæ.

⁴⁰Miserunt ad viros venientes de longe,

ad quos nuntium miserant:

itaque ecce venerunt quibus te lavisti,

et circumlinisti stibio oculos tuos,

et ornata es mundo muliebri.

⁴¹Sedisti in lecto pulcherrimo,

et mensa ornata est ante te:

thymiama meum et unguentum meum posuisti super eam.

⁴²Et vox multitudinis exsultantis erat in ea:

et in viris, qui de multitudine hominum adducebantur,

et veniebant de deserto,

posuerunt armillas in manibus eorum,

et coronas speciosas in capitibus eorum.

⁴³Et dixi ei, quæ attrita est in adulteriis:

Nunc fornicabitur in fornicatione sua etiam hæc.

⁴⁴Et ingressi sunt ad eam quasi ad mulierem meretricem:

sic ingrediebantur ad Oollam et Oolibam, mulieres nefarias.

⁴⁵Viri ergo justi sunt:

hi judicabunt eas judicio adulterarum,

et judicio effundentium sanguinem:

quia adulteræ sunt,

et sanguis in manibus earum.

⁴⁶Hæc enim dicit Dominus Deus:

Adduc ad eas multitudinem,

et trade eas in tumultum et in rapinam.

⁴⁷Et lapidentur lapidibus populorum,

et confodiantur gladiis eorum:

filios et filias earum interficient,

et domos earum igne succendent.

⁴⁸Et auferam scelus de terra,

et discent omnes mulieres ne faciant secundum scelus earum.

⁴⁹Et dabunt scelus vestrum super vos,

et peccata idolorum vestrorum portabitis:

et scietis quia ego Dominus Deus.