Psalm 76:3–13

³In die tribulationis meæ Deum exquisivi;

manibus meis nocte contra eum, et non sum deceptus.

Renuit consolari anima mea;

⁴memor fui Dei, et delectatus sum,

et exercitatus sum, et defecit spiritus meus.

⁵Anticipaverunt vigilias oculi mei;

turbatus sum, et non sum locutus.

⁶Cogitavi dies antiquos,

et annos æternos in mente habui.

⁷Et meditatus sum nocte cum corde meo,

et exercitabar, et scopebam spiritum meum.

⁸Numquid in æternum projiciet Deus?

aut non apponet ut complacitior sit adhuc?

⁹aut in finem misericordiam suam abscindet,

a generatione in generationem?

¹⁰aut obliviscetur misereri Deus?

aut continebit in ira sua misericordias suas?

¹¹Et dixi: Nunc cœpi;

hæc mutatio dexteræ Excelsi.

¹²Memor fui operum Domini,

quia memor ero ab initio mirabilium tuorum:

¹³et meditabor in omnibus operibus tuis,

et in adinventionibus tuis exercebor.