James 2:1–13

¹Fratres mei, nolite in personarum acceptione habere fidem Domini nostri Jesu Christi gloriæ. ²Etenim si introierit in conventum vestrum vir aureum annulum habens in veste candida, introierit autem et pauper in sordido habitu, ³et intendatis in eum qui indutus est veste præclara, et dixeritis ei: Tu sede hic bene: pauperi autem dicatis: Tu sta illic; aut sede sub scabello pedum meorum: ⁴nonne judicatis apud vosmetipsos, et facti estis judices cogitationum iniquarum? ⁵Audite, fratres mei dilectissimi: nonne Deus elegit pauperes in hoc mundo, divites in fide, et hæredes regni, quod repromisit Deus diligentibus se? ⁶vos autem exhonorastis pauperem. Nonne divites per potentiam opprimunt vos, et ipsi trahunt vos ad judicia? ⁷nonne ipsi blasphemant bonum nomen, quod invocatum est super vos? ⁸Si tamen legem perficitis regalem secundum Scripturas: Diliges proximum tuum sicut teipsum: bene facitis: ⁹si autem personas accipitis, peccatum operamini, redarguti a lege quasi transgressores. ¹⁰Quicumque autem totam legem servaverit, offendat autem in uno, factus est omnium reus. ¹¹Qui enim dixit: Non mœchaberis, dixit et: Non occides. Quod si non mœchaberis, occides autem, factus es transgressor legis. ¹²Sic loquimini, et sic facite sicut per legem libertatis incipientes judicari. ¹³Judicium enim sine misericordia illi qui non fecit misericordiam: superexaltat autem misericordia judicium.