Isaiah 5:8–17

⁸Væ qui conjungitis domum ad domum,

et agrum agro copulatis

usque ad terminum loci!

Numquid habitabitis vos soli

in medio terræ?

⁹In auribus meis sunt hæc,

dicit Dominus exercituum;

nisi domus multæ desertæ fuerint,

grandes et pulchræ, absque habitatore.

¹⁰Decem enim jugera vinearum facient lagunculam unam,

et triginta modii sementis facient modios tres.

¹¹Væ qui consurgitis mane

ad ebrietatem sectandam,

et potandum usque ad vesperam,

ut vino æstuetis!

¹²Cithara, et lyra, et tympanum,

et tibia, et vinum in conviviis vestris;

et opus Domini non respicitis,

nec opera manuum ejus consideratis.

¹³Propterea captivus ductus est populus meus,

quia non habuit scientiam,

et nobiles ejus interierunt fame,

et multitudo ejus siti exaruit.

¹⁴Propterea dilatavit infernus animam suam,

et aperuit os suum absque ullo termino;

et descendent fortes ejus,

et populus ejus, et sublimes gloriosique ejus, ad eum.

¹⁵Et incurvabitur homo, et humiliabitur vir,

et oculi sublimium deprimentur.

¹⁶Et exaltabitur Dominus exercituum in judicio;

et Deus sanctus sanctificabitur in justitia.

¹⁷Et pascentur agni juxta ordinem suum,

et deserta in ubertatem versa advenæ comedent.