Genesis 9–11

9¹Benedixitque Deus Noë et filiis ejus. Et dixit ad eos: Crescite, et multiplicamini, et replete terram. ²Et terror vester ac tremor sit super cuncta animalia terræ, et super omnes volucres cæli, cum universis quæ moventur super terram: omnes pisces maris manui vestræ traditi sunt. ³Et omne, quod movetur et vivit, erit vobis in cibum: quasi olera virentia tradidi vobis omnia. ⁴Excepto, quod carnem cum sanguine non comedetis. ⁵Sanguinem enim animarum vestrarum requiram de manu cunctarum bestiarum: et de manu hominis, de manu viri, et fratris ejus requiram animam hominis. ⁶Quicumque effuderit humanum sanguinem, fundetur sanguis illius: ad imaginem quippe Dei factus est homo. ⁷Vos autem crescite et multiplicamini, et ingredimini super terram, et implete eam.

⁸Hæc quoque dixit Deus ad Noë, et ad filios ejus cum eo: ⁹Ecce ego statuam pactum meum vobiscum, et cum semine vestro post vos: ¹⁰et ad omnem animam viventem, quæ est vobiscum, tam in volucribus quam in jumentis et pecudibus terræ cunctis, quæ egressa sunt de arca, et universis bestiis terræ. ¹¹Statuam pactum meum vobiscum, et nequaquam ultra interficietur omnis caro aquis diluvii, neque erit deinceps diluvium dissipans terram. ¹²Dixitque Deus: Hoc signum fœderis quod do inter me et vos, et ad omnem animam viventem, quæ est vobiscum in generationes sempiternas: ¹³arcum meum ponam in nubibus, et erit signum fœderis inter me et inter terram. ¹⁴Cumque obduxero nubibus cælum, apparebit arcus meus in nubibus: ¹⁵et recordabor fœderis mei vobiscum, et cum omni anima vivente quæ carnem vegetat: et non erunt ultra aquæ diluvii ad delendum universam carnem. ¹⁶Eritque arcus in nubibus, et videbo illum, et recordabor fœderis sempiterni quod pactum est inter Deum et omnem animam viventem universæ carnis quæ est super terram. ¹⁷Dixitque Deus ad Noë: Hoc erit signum fœderis, quod constitui inter me et omnem carnem super terram.

¹⁸Erant ergo filii Noë, qui egressi sunt de arca, Sem, Cham et Japheth: porro Cham ipse est pater Chanaan. ¹⁹Tres isti filii sunt Noë: et ab his disseminatum est omne genus hominum super universam terram. ²⁰Cœpitque Noë vir agricola exercere terram, et plantavit vineam. ²¹Bibensque vinum inebriatus est, et nudatus in tabernaculo suo. ²²Quod cum vidisset Cham, pater Chanaan, verenda scilicet patris sui esse nudata, nuntiavit duobus fratribus suis foras. ²³At vero Sem et Japheth pallium imposuerunt humeris suis, et incedentes retrorsum, operuerunt verenda patris sui: faciesque eorum aversæ erant, et patris virilia non viderunt. ²⁴Evigilans autem Noë ex vino, cum didicisset quæ fecerat ei filius suus minor, ²⁵ait:

Maledictus Chanaan,

servus servorum erit fratribus suis.

²⁶Dixitque:

Benedictus Dominus Deus Sem,

sit Chanaan servus ejus.

²⁷Dilatet Deus Japheth, et habitet in tabernaculis Sem,

sitque Chanaan servus ejus.

²⁸Vixit autem Noë post diluvium trecentis quinquaginta annis. ²⁹Et impleti sunt omnes dies ejus nongentorum quinquaginta annorum: et mortuus est.

10¹Hæ sunt generationes filiorum Noë, Sem, Cham et Japheth: natique sunt eis filii post diluvium. ²Filii Japheth: Gomer, et Magog, et Madai, et Javan, et Thubal, et Mosoch, et Thiras. ³Porro filii Gomer: Ascenez et Riphath et Thogorma. ⁴Filii autem Javan: Elisa et Tharsis, Cetthim et Dodanim. ⁵Ab his divisæ sunt insulæ gentium in regionibus suis, unusquisque secundum linguam suam et familias suas in nationibus suis.

⁶Filii autem Cham: Chus, et Mesraim, et Phuth, et Chanaan. ⁷Filii Chus: Saba, et Hevila, et Sabatha, et Regma, et Sabatacha. Filii Regma: Saba et Dadan. ⁸Porro Chus genuit Nemrod: ipse cœpit esse potens in terra, ⁹et erat robustus venator coram Domino. Ob hoc exivit proverbium: Quasi Nemrod robustus venator coram Domino. ¹⁰Fuit autem principium regni ejus Babylon, et Arach et Achad, et Chalanne, in terra Sennaar. ¹¹De terra illa egressus est Assur, et ædificavit Niniven, et plateas civitatis, et Chale. ¹²Resen quoque inter Niniven et Chale: hæc est civitas magna. ¹³At vero Mesraim genuit Ludim, et Anamim et Laabim, Nephthuim, ¹⁴et Phetrusim, et Chasluim: de quibus egressi sunt Philisthiim et Caphtorim. ¹⁵Chanaan autem genuit Sidonem primogenitum suum. Hethæum, ¹⁶et Jebusæum, et Amorrhæum, Gergesæum, ¹⁷Hevæum, et Aracæum: Sinæum, ¹⁸et Aradium, Samaræum, et Amathæum: et post hæc disseminati sunt populi Chananæorum. ¹⁹Factique sunt termini Chanaan venientibus a Sidone Geraram usque Gazam, donec ingrediaris Sodomam et Gomorrham, et Adamam, et Seboim usque Lesa. ²⁰Hi sunt filii Cham in cognationibus, et linguis, et generationibus, terrisque et gentibus suis.

²¹De Sem quoque nati sunt, patre omnium filiorum Heber, fratre Japheth majore. ²²Filii Sem: Ælam, et Assur, et Arphaxad, et Lud, et Aram. ²³Filii Aram: Us, et Hul, et Gether, et Mes. ²⁴At vero Arphaxad genuit Sale, de quo ortus est Heber. ²⁵Natique sunt Heber filii duo: nomen uni Phaleg, eo quod in diebus ejus divisa sit terra: et nomen fratris ejus Jectan. ²⁶Qui Jectan genuit Elmodad, et Saleph, et Asarmoth, Jare, ²⁷et Aduram, et Uzal, et Decla, ²⁸et Ebal, et Abimaël, Saba, ²⁹et Ophir, et Hevila, et Jobab: omnes isti, filii Jectan. ³⁰Et facta est habitatio eorum de Messa pergentibus usque Sephar montem orientalem. ³¹Isti filii Sem secundum cognationes, et linguas, et regiones in gentibus suis. ³²Hæ familiæ Noë juxta populos et nationes suas. Ab his divisæ sunt gentes in terra post diluvium.

11¹Erat autem terra labii unius, et sermonum eorumdem. ²Cumque proficiscerentur de oriente, invenerunt campum in terra Senaar, et habitaverunt in eo. ³Dixitque alter ad proximum suum: Venite, faciamus lateres, et coquamus eos igni. Habueruntque lateres pro saxis, et bitumen pro cæmento: ⁴et dixerunt: Venite, faciamus nobis civitatem et turrim, cujus culmen pertingat ad cælum: et celebremus nomen nostrum antequam dividamur in universas terras. ⁵Descendit autem Dominus ut videret civitatem et turrim, quam ædificabant filii Adam, ⁶et dixit: Ecce, unus est populus, et unum labium omnibus: cœperuntque hoc facere, nec desistent a cogitationibus suis, donec eas opere compleant. ⁷Venite igitur, descendamus, et confundamus ibi linguam eorum, ut non audiat unusquisque vocem proximi sui. ⁸Atque ita divisit eos Dominus ex illo loco in universas terras, et cessaverunt ædificare civitatem. ⁹Et idcirco vocatum est nomen ejus Babel, quia ibi confusum est labium universæ terræ: et inde dispersit eos Dominus super faciem cunctarum regionum.

¹⁰Hæ sunt generationes Sem: Sem erat centum annorum quando genuit Arphaxad, biennio post diluvium. ¹¹Vixitque Sem, postquam genuit Arphaxad, quingentis annis: et genuit filios et filias. ¹²Porro Arphaxad vixit triginta quinque annis, et genuit Sale. ¹³Vixitque Arphaxad, postquam genuit Sale, trecentis tribus annis: et genuit filios et filias. ¹⁴Sale quoque vixit triginta annis, et genuit Heber. ¹⁵Vixitque Sale, postquam genuit Heber, quadringentis tribus annis: et genuit filios et filias. ¹⁶Vixit autem Heber triginta quatuor annis, et genuit Phaleg. ¹⁷Et vixit Heber postquam genuit Phaleg, quadringentis triginta annis: et genuit filios et filias. ¹⁸Vixit quoque Phaleg triginta annis, et genuit Reu. ¹⁹Vixitque Phaleg, postquam genuit Reu, ducentis novem annis: et genuit filios et filias. ²⁰Vixit autem Reu triginta duobus annis, et genuit Sarug. ²¹Vixit quoque Reu, postquam genuit Sarug, ducentis septem annis: et genuit filios et filias. ²²Vixit vero Sarug triginta annis, et genuit Nachor. ²³Vixitque Sarug, postquam genuit Nachor, ducentis annis: et genuit filios et filias. ²⁴Vixit autem Nachor viginti novem annis, et genuit Thare. ²⁵Vixitque Nachor, postquam genuit Thare, centum decem et novem annis: et genuit filios et filias. ²⁶Vixitque Thare septuaginta annis, et genuit Abram, et Nachor, et Aran.

²⁷Hæ sunt autem generationes Thare: Thare genuit Abram, Nachor et Aran. Porro Aran genuit Lot. ²⁸Mortuusque est Aran ante Thare patrem suum, in terra nativitatis suæ, in Ur Chaldæorum. ²⁹Duxerunt autem Abram et Nachor uxores: nomen uxoris Abram, Sarai: et nomen uxoris Nachor, Melcha filia Aran, patris Melchæ, et patris Jeschæ. ³⁰Erat autem Sarai sterilis, nec habebat liberos. ³¹Tulit itaque Thare Abram filium suum, et Lot filium Aran, filium filii sui, et Sarai nurum suam, uxorem Abram filii sui, et eduxit eos de Ur Chaldæorum, ut irent in terram Chanaan: veneruntque usque Haran, et habitaverunt ibi. ³²Et facti sunt dies Thare ducentorum quinque annorum, et mortuus est in Haran.