Exodus 35–39

35¹Igitur congregata omni turba filiorum Israël, dixit ad eos: Hæc sunt quæ jussit Dominus fieri. ²Sex diebus facietis opus: septimus dies erit vobis sanctus, sabbatum, et requies Domini: qui fecerit opus in eo, occidetur. ³Non succendetis ignem in omnibus habitaculis vestris per diem sabbati. ⁴Et ait Moyses ad omnem catervam filiorum Israël: Iste est sermo quem præcepit Dominus, dicens: ⁵Separate apud vos primitias Domino. Omnis voluntarius et prono animo offerat eas Domino: aurum et argentum, et æs, ⁶hyacinthum et purpuram, coccumque bis tinctum, et byssum, pilos caprarum, ⁷pellesque arietum rubricatas, et janthinas, ligna setim, ⁸et oleum ad luminaria concinnanda, et ut conficiatur unguentum, et thymiama suavissimum, ⁹lapides onychinos, et gemmas ad ornatum superhumeralis et rationalis. ¹⁰Quisque vestrum sapiens est, veniat, et faciat quod Dominus imperavit: ¹¹tabernaculum scilicet, et tectum ejus, atque operimentum, annulos, et tabulata cum vectibus, paxillos, et bases: ¹²arcam et vectes, propitiatorium, et velum, quod ante illud oppanditur: ¹³mensam cum vectibus et vasis, et propositionis panibus: ¹⁴candelabrum ad luminaria sustentanda, vasa illius et lucernas, et oleum ad nutrimenta ignium: ¹⁵altare thymiamatis, et vectes, et oleum unctionis et thymiama ex aromatibus: tentorium ad ostium tabernaculi: ¹⁶altare holocausti, et craticulam ejus æneam cum vectibus et vasis suis: labrum et basim ejus: ¹⁷cortinas atrii cum columnis et basibus, tentorium in foribus vestibuli, ¹⁸paxillos tabernaculi et atrii cum funiculis suis: ¹⁹vestimenta, quorum usus est in ministerio sanctuarii, vestes Aaron pontificis ac filiorum ejus, ut sacerdotio fungantur mihi. ²⁰Egressaque omnis multitudo filiorum Israël de conspectu Moysi, ²¹obtulerunt mente promptissima atque devota primitias Domino, ad faciendum opus tabernaculi testimonii. Quidquid ad cultum et ad vestes sanctas necessarium erat, ²²viri cum mulieribus præbuerunt, armillas et inaures, annulos et dextralia: omne vas aureum in donaria Domini separatum est. ²³Si quis habebat hyacinthum, et purpuram, coccumque bis tinctum, byssum et pilos caprarum, pelles arietum rubricatas, et janthinas, ²⁴argenti, ærisque metalla, obtulerunt Domino, lignaque setim in varios usus. ²⁵Sed et mulieres doctæ, quæ neverant, dederunt hyacinthum, purpuram, et vermiculum, ac byssum, ²⁶et pilos caprarum, sponte propria cuncta tribuentes. ²⁷Principes vero obtulerunt lapides onychinos, et gemmas ad superhumerale et rationale, ²⁸aromataque et oleum ad luminaria concinnanda, et ad præparandum unguentum, ac thymiama odoris suavissimi componendum. ²⁹Omnes viri et mulieres mente devota obtulerunt donaria, ut fierent opera, quæ jusserat Dominus per manum Moysi. Cuncti filii Israël voluntaria Domino dedicaverunt.

³⁰Dixitque Moyses ad filios Israël: Ecce, vocavit Dominus ex nomine Beseleel filium Uri, filii Hur de tribu Juda, ³¹implevitque eum spiritu Dei, sapientia et intelligentia, et scientia et omni doctrina, ³²ad excogitandum, et faciendum opus in auro, et argento, et ære, ³³sculpendisque lapidibus, et opere carpentario, quidquid fabre adinveniri potest, ³⁴dedit in corde ejus: Ooliab quoque filium Achisamech de tribu Dan: ³⁵ambos erudivit sapientia, ut faciant opera abietarii, polymitarii, ac plumarii, de hyacintho ac purpura, coccoque bis tincto, et bysso, et texant omnia, ac nova quæque reperiant.

36¹Fecit ergo Beseleel, et Ooliab, et omnis vir sapiens, quibus dedit Dominus sapientiam et intellectum, ut scirent fabre operari quæ in usus sanctuarii necessaria sunt, et quæ præcepit Dominus. ²Cumque vocasset eos Moyses et omnem eruditum virum, cui dederat Dominus sapientiam, et qui sponte sua obtulerant se ad faciendum opus, ³tradidit eis universa donaria filiorum Israël. Qui cum instarent operi, quotidie mane vota populus offerebat. ⁴Unde artifices venire compulsi, ⁵dixerunt Moysi: Plus offert populus quam necessarium est. ⁶Jussit ergo Moyses præconis voce cantari: Nec vir, nec mulier quidquam offerat ultra in opere sanctuarii. Sicque cessatum est a muneribus offerendis, ⁷eo quod oblata sufficerent et superabundarent.

⁸Feceruntque omnes corde sapientes ad explendum opus tabernaculi, cortinas decem de bysso retorta, et hyacintho, et purpura, coccoque bis tincto, opere vario, et arte polymita: ⁹quarum una habebat in longitudine viginti octo cubitos, et in latitudine quatuor; una mensura erat omnium cortinarum. ¹⁰Conjunxitque cortinas quinque, alteram alteri, et alias quinque sibi invicem copulavit. ¹¹Fecit et ansas hyacinthinas in ora cortinæ unius ex utroque latere, et in ora cortinæ alterius similiter, ¹²ut contra se invicem venirent ansæ, et mutuo jungerentur. ¹³Unde et quinquaginta fudit circulos aureos, qui morderent cortinarum ansas, et fieret unum tabernaculum. ¹⁴Fecit et saga undecim de pilis caprarum ad operiendum tectum tabernaculi: ¹⁵unum sagum in longitudine habebat cubitos triginta, et in latitudine cubitos quatuor: unius mensuræ erant omnia saga: ¹⁶quorum quinque junxit seorsum, et sex alia separatim. ¹⁷Fecitque ansas quinquaginta in ora sagi unius, et quinquaginta in ora sagi alterius, ut sibi invicem jungerentur. ¹⁸Et fibulas æneas quinquaginta, quibus necteretur tectum, ut unum pallium ex omnibus sagis fieret. ¹⁹Fecit et opertorium tabernaculi de pellibus arietum rubricatis: aliudque desuper velamentum de pellibus janthinis. ²⁰Fecit et tabulas tabernaculi de lignis setim stantes. ²¹Decem cubitorum erat longitudo tabulæ unius: et unum ac semis cubitum latitudo retinebat. ²²Binæ incastraturæ erant per singulas tabulas, ut altera alteri jungeretur. Sic fecit in omnibus tabernaculi tabulis. ²³E quibus viginti ad plagam meridianam erant contra austrum, ²⁴cum quadraginta basibus argenteis. Duæ bases sub una tabula ponebantur ex utraque parte angulorum, ubi incastraturæ laterum in angulis terminantur. ²⁵Ad plagam quoque tabernaculi, quæ respicit ad aquilonem, fecit viginti tabulas, ²⁶cum quadraginta basibus argenteis, duas bases per singulas tabulas. ²⁷Contra occidentem vero, id est, ad eam partem tabernaculi quæ mare respicit, fecit sex tabulas, ²⁸et duas alias per singulos angulos tabernaculi retro: ²⁹quæ junctæ erant a deorsum usque sursum, et in unam compaginem pariter ferebantur. Ita fecit ex utraque parte per angulos: ³⁰ut octo essent simul tabulæ, et haberent bases argenteas sedecim, binas scilicet bases sub singulis tabulis. ³¹Fecit et vectes de lignis setim, quinque ad continendas tabulas unius lateris tabernaculi, ³²et quinque alios ad alterius lateris coaptandas tabulas: et extra hos, quinque alios vectes ad occidentalem plagam tabernaculi contra mare. ³³Fecit quoque vectem alium, qui per medias tabulas ab angulo usque ad angulum perveniret. ³⁴Ipsa autem tabulata deauravit, fusis basibus earum argenteis. Et circulos eorum fecit aureos, per quos vectes induci possent: quos et ipsos laminis aureis operuit. ³⁵Fecit et velum de hyacintho, et purpura, vermiculo, ac bysso retorta, opere polymitario, varium atque distinctum: ³⁶et quatuor columnas de lignis setim, quas cum capitibus deauravit, fusis basibus earum argenteis. ³⁷Fecit et tentorium in introitu tabernaculi ex hyacintho, purpura, vermiculo, byssoque retorta, opere plumarii: ³⁸et columnas quinque cum capitibus suis, quas operuit auro, basesque earum fudit æneas.

37¹Fecit autem Beseleel et arcam de lignis setim, habentem duos semis cubitos in longitudine, et cubitum ac semissem in latitudine, altitudo quoque unius cubiti fuit et dimidii: vestivitque eam auro purissimo intus ac foris. ²Et fecit illi coronam auream per gyrum, ³conflans quatuor annulos aureos per quatuor angulos ejus: duos annulos in latere uno, et duos in altero. ⁴Vectes quoque fecit de lignis setim, quos vestivit auro, ⁵et quos misit in annulos, qui erant in lateribus arcæ ad portandum eam. ⁶Fecit et propitiatorium, id est, oraculum, de auro mundissimo, duorum cubitorum et dimidii in longitudine, et cubiti ac semis in latitudine. ⁷Duos etiam cherubim ex auro ductili, quos posuit ex utraque parte propitiatorii: ⁸cherub unum in summitate unius partis, et cherub alterum in summitate partis alterius: duos cherubim in singulis summitatibus propitiatorii, ⁹extendentes alas, et tegentes propitiatorium, seque mutuo et illud respicientes.

¹⁰Fecit et mensam de lignis setim in longitudine duorum cubitorum, et in latitudine unius cubiti, quæ habebat in altitudine cubitum ac semissem. ¹¹Circumdeditque eam auro mundissimo, et fecit illi labium aureum per gyrum, ¹²ipsique labio coronam auream interrasilem quatuor digitorum, et super eamdem, alteram coronam auream. ¹³Fudit et quatuor circulos aureos, quos posuit in quatuor angulis per singulos pedes mensæ ¹⁴contra coronam: misitque in eos vectes, ut possit mensa portari. ¹⁵Ipsos quoque vectes fecit de lignis setim, et circumdedit eos auro. ¹⁶Et vasa ad diversos usus mensæ, acetabula, phialas, et cyathos, et thuribula, ex auro puro, in quibus offerenda sunt libamina.

¹⁷Fecit et candelabrum ductile de auro mundissimo, de cujus vecte calami, scyphi, sphærulæque, ac lilia procedebant: ¹⁸sex in utroque latere, tres calami ex parte una, et tres ex altera: ¹⁹tres scyphi in nucis modum per calamos singulos, sphærulæque simul et lilia: et tres scyphi instar nucis in calamo altero, sphærulæque simul et lilia. Æquum erat opus sex calamorum, qui procedebant de stipite candelabri. ²⁰In ipso autem vecte erant quatuor scyphi in nucis modum, sphærulæque per singulos simul et lilia: ²¹et sphærulæ sub duobus calamis per loca tria, qui simul sex fiunt calami procedentes de vecte uno. ²²Et sphærulæ igitur, et calami ex ipso erant, universa ductilia ex auro purissimo. ²³Fecit et lucernas septem cum emunctoriis suis, et vasa ubi ea, quæ emuncta sunt, extinguantur, de auro mundissimo. ²⁴Talentum auri appendebat candelabrum cum omnibus vasis suis.

²⁵Fecit et altare thymiamatis de lignis setim, per quadrum singulos habens cubitos, et in altitudine duos: e…