²⁰Nunc autem Christus resurrexit a mortuis primitiæ dormientium, ²¹quoniam quidem per hominem mors, et per hominem resurrectio mortuorum. ²²Et sicut in Adam omnes moriuntur, ita et in Christo omnes vivificabuntur. ²³Unusquisque autem in suo ordine, primitiæ Christus: deinde ii qui sunt Christi, qui in adventu ejus crediderunt. ²⁴Deinde finis: cum tradiderit regnum Deo et Patri, cum evacuaverit omnem principatum, et potestatem, et virtutem. ²⁵Oportet autem illum regnare donec ponat omnes inimicos sub pedibus ejus. ²⁶Novissima autem inimica destruetur mors: omnia enim subjecit pedibus ejus. Cum autem dicat: ²⁷Omnia subjecta sunt ei, sine dubio præter eum qui subjecit ei omnia. ²⁸Cum autem subjecta fuerint illi omnia: tunc et ipse Filius subjectus erit ei, qui subjecit sibi omnia, ut sit Deus omnia in omnibus. ²⁹Alioquin quid facient qui baptizantur pro mortuis, si omnino mortui non resurgunt? ut quid et baptizantur pro illis? ³⁰ut quid et nos periclitamur omni hora? ³¹Quotidie morior per vestram gloriam, fratres, quam habeo in Christo Jesu Domino nostro. ³²Si secundum hominem ad bestias pugnavi Ephesi, quid mihi prodest, si mortui non resurgunt? Manducemus, et bibamus, cras enim moriemur. ³³Nolite seduci: corrumpunt mores bonos colloquia mala. ³⁴Evigilate justi, et nolite peccare: ignorantiam enim Dei quidam habent, ad reverentiam vobis loquor.

³⁵Sed dicet aliquis: Quomodo resurgunt mortui? qualive corpore venient? ³⁶Insipiens, tu quod seminas non vivificatur, nisi prius moriatur: ³⁷et quod seminas, non corpus, quod futurum est, seminas, sed nudum granum, ut puta tritici, aut alicujus ceterorum. ³⁸Deus autem dat illi corpus sicut vult: et unicuique seminum proprium corpus. ³⁹Non omnis caro, eadem caro: sed alia quidem hominum, alia vero pecorum, alia volucrum, alia autem piscium. ⁴⁰Et corpora cælestia, et corpora terrestria: sed alia quidem cælestium gloria, alia autem terrestrium. ⁴¹Alia claritas solis, alia claritas lunæ, et alia claritas stellarum. Stella enim a stella differt in claritate: ⁴²sic et resurrectio mortuorum. Seminatur in corruptione, surget in incorruptione. ⁴³Seminatur in ignobilitate, surget in gloria: seminatur in infirmitate, surget in virtute: ⁴⁴seminatur corpus animale, surget corpus spiritale. Si est corpus animale, est et spiritale, sicut scriptum est: ⁴⁵Factus est primus homo Adam in animam viventem, novissimus Adam in spiritum vivificantem. ⁴⁶Sed non prius quod spiritale est, sed quod animale: deinde quod spiritale. ⁴⁷Primus homo de terra, terrenus: secundus homo de cælo, cælestis. ⁴⁸Qualis terrenus, tales et terreni: et qualis cælestis, tales et cælestes. ⁴⁹Igitur, sicut portavimus imaginem terreni, portemus et imaginem cælestis.

Read in Logos

1 Corinthians 15:19–20: If in Christ we have hope in this life only, we are of all people most to be pitied. But in fact Christ has been raised from the dead, the firstfruits of those who have fallen asleep.

Public Domain