Psalm 82:5–13

⁵Dixerunt: Venite, et disperdamus eos de gente,

et non memoretur nomen Israël ultra.

⁶Quoniam cogitaverunt unanimiter;

simul adversum te testamentum disposuerunt:

⁷tabernacula Idumæorum et Ismahelitæ,

Moab et Agareni,

⁸Gebal, et Ammon, et Amalec;

alienigenæ cum habitantibus Tyrum.

⁹Etenim Assur venit cum illis:

facti sunt in adjutorium filiis Lot.

¹⁰Fac illis sicut Madian et Sisaræ,

sicut Jabin in torrente Cisson.

¹¹Disperierunt in Endor;

facti sunt ut stercus terræ.

¹²Pone principes eorum sicut Oreb,

et Zeb, et Zebee, et Salmana:

omnes principes eorum,

¹³qui dixerunt: Hæreditate possideamus sanctuarium Dei.