Psalm 78:3–10

³Effuderunt sanguinem eorum tamquam aquam in circuitu Jerusalem,

et non erat qui sepeliret.

⁴Facti sumus opprobrium vicinis nostris;

subsannatio et illusio his qui in circuitu nostro sunt.

⁵Usquequo, Domine, irasceris in finem?

accendetur velut ignis zelus tuus?

⁶Effunde iram tuam in gentes quæ te non noverunt,

et in regna quæ nomen tuum non invocaverunt:

⁷quia comederunt Jacob,

et locum ejus desolaverunt.

⁸Ne memineris iniquitatum nostrarum antiquarum;

cito anticipent nos misericordiæ tuæ,

quia pauperes facti sumus nimis.

⁹Adjuva nos, Deus salutaris noster,

et propter gloriam nominis tui, Domine, libera nos:

et propitius esto peccatis nostris, propter nomen tuum.

¹⁰Ne forte dicant in gentibus: Ubi est Deus eorum?

et innotescat in nationibus coram oculis nostris

ultio sanguinis servorum tuorum qui effusus est.