Numbers 23:7–10

⁷assumptaque parabola sua, dixit:

De Aram adduxit me Balac

rex Moabitarum, de montibus orientis:

Veni, inquit, et maledic Jacob;

propera, et detestare Israël.

⁸Quomodo maledicam, cui non maledixit Deus?

qua ratione detester, quem Dominus non detestatur?

⁹De summis silicibus videbo eum,

et de collibus considerabo illum.

Populus solus habitabit,

et inter gentes non reputabitur.

¹⁰Quis dinumerare possit pulverem Jacob,

et nosse numerum stirpis Israël?

Moriatur anima mea morte justorum,

et fiant novissima mea horum similia.