²⁶Et dicebat: Sic est regnum Dei, quemadmodum si homo jaciat sementem in terram, ²⁷et dormiat, et exsurgat nocte et die, et semen germinet, et increscat dum nescit ille. ²⁸Ultro enim terra fructificat, primum herbam, deinde spicam, deinde plenum frumentum in spica. ²⁹Et cum produxerit fructus, statim mittit falcem, quoniam adsit messis. ³⁰Et dicebat: Cui assimilabimus regnum Dei? aut cui parabolæ comparabimus illud? ³¹Sicut granum sinapis, quod cum seminatum fuerit in terra, minus est omnibus seminibus, quæ sunt in terra: ³²et cum seminatum fuerit, ascendit, et fit majus omnibus oleribus, et facit ramos magnos, ita ut possint sub umbra ejus aves cæli habitare. ³³Et talibus multis parabolis loquebatur eis verbum, prout poterant audire: ³⁴sine parabola autem non loquebatur eis: seorsum autem discipulis suis disserebat omnia.

Read in Logos

Public Domain