²²Et manducantibus illis, accepit Jesus panem: et benedicens fregit, et dedit eis, et ait: Sumite, hoc est corpus meum. ²³Et accepto calice, gratias agens dedit eis: et biberunt ex illo omnes. ²⁴Et ait illis: Hic est sanguis meus novi testamenti, qui pro multis effundetur. ²⁵Amen dico vobis, quia jam non bibam de hoc genimine vitis usque in diem illum, cum illud bibam novum in regno Dei.

²⁶Et hymno dicto exierunt in montem Olivarum. ²⁷Et ait eis Jesus: Omnes scandalizabimini in me in nocte ista: quia scriptum est: Percutiam pastorem, et dispergentur oves. ²⁸Sed postquam resurrexero, præcedam vos in Galilæam. ²⁹Petrus autem ait illi: Et si omnes scandalizati fuerint in te, sed non ego. ³⁰Et ait illi Jesus: Amen dico tibi, quia tu hodie in nocte hac, priusquam gallus vocem bis dederit, ter me es negaturus. ³¹At ille amplius loquebatur: Et si oportuerit me simul commori tibi, non te negabo. Similiter autem et omnes dicebant.

Read in Logos

Mark 14:24: …This is my blood of the covenant, which is poured out for many.

Public Domain