Job 22:21–30

²¹Acquiesce igitur ei, et habeto pacem,

et per hæc habebis fructus optimos.

²²Suscipe ex ore illius legem,

et pone sermones ejus in corde tuo.

²³Si reversus fueris ad Omnipotentem, ædificaberis,

et longe facies iniquitatem a tabernaculo tuo.

²⁴Dabit pro terra silicem,

et pro silice torrentes aureos.

²⁵Eritque Omnipotens contra hostes tuos,

et argentum coacervabitur tibi.

²⁶Tunc super Omnipotentem deliciis afflues,

et elevabis ad Deum faciem tuam.

²⁷Rogabis eum, et exaudiet te,

et vota tua reddes.

²⁸Decernes rem, et veniet tibi,

et in viis tuis splendebit lumen.

²⁹Qui enim humiliatus fuerit, erit in gloria,

et qui inclinaverit oculos, ipse salvabitur.

³⁰Salvabitur innocens:

salvabitur autem in munditia manuum suarum.