Exodus 12:40–51

⁴⁰Habitatio autem filiorum Israël qua manserunt in Ægypto, fuit quadringentorum triginta annorum. ⁴¹Quibus expletis, eadem die egressus est omnis exercitus Domini de terra Ægypti. ⁴²Nox ista est observabilis Domino, quando eduxit eos de terra Ægypti: hanc observare debent omnes filii Israël in generationibus suis.

⁴³Dixitque Dominus ad Moysen et Aaron: Hæc est religio Phase: omnis alienigena non comedet ex eo. ⁴⁴Omnis autem servus emptitius circumcidetur, et sic comedet. ⁴⁵Advena et mercenarius non edent ex eo. ⁴⁶In una domo comedetur, nec efferetis de carnibus ejus foras, nec os illius confringetis. ⁴⁷Omnis cœtus filiorum Israël faciet illud. ⁴⁸Quod si quis peregrinorum in vestram voluerit transire coloniam, et facere Phase Domini, circumcidetur prius omne masculinum ejus, et tunc rite celebrabit: eritque sicut indigena terræ: si quis autem circumcisus non fuerit, non vescetur ex eo. ⁴⁹Eadem lex erit indigenæ et colono qui peregrinatur apud vos. ⁵⁰Feceruntque omnes filii Israël sicut præceperat Dominus Moysi et Aaron. ⁵¹Et eadem die eduxit Dominus filios Israël de terra Ægypti per turmas suas.