3 Esdras 7

7¹Tunc Sisennes subregulus Cœlesyriæ, et Phœnicis, et Satrabuzanes, et sodales obsecuti his, quæ a Dario rege erant decreta, ²insistebant sacrosanctis operibus diligentissime, cooperantes cum senioribus Iudæorum principibus Syriæ. ³et prosperata sunt sacrosancta opera prophetantibus Aggæo et Zacharia prophetis. ⁴Et consummaverunt omnia per præceptum Domini Dei Israel, et ex consilio Cyri, et Darii, et Artaxerxis regis Persarum. ⁵Et consummata est domus nostra usque ad tertiam et vicesimam diem mensis Adar, sexto anno Darii regis.

⁶Et fecerunt filii Israel et sacerdotes et Levitæ, et ceteri qui erant ex captivitate, qui appositi sunt secundum ea quæ scripta sunt in libro Moysi. ⁷Et obtulerunt in dedicationem templi Domini, tauros centum, arietes ducentos, agnos quadringentos, ⁸et hœdos pro peccatis universi Israel, duodecim, secundum numerum tribuum Israel. ⁹Et steterunt sacerdotes et Levitæ amicti stolis per tribus super omnia opera Domini Dei Israel secundum librum Moysi, et ostiarii per singulas ianuas.

¹⁰Et egerunt filii Israel cum his qui erant ex captivitate, illud Phase quartadecima luna mensis primi, quando sanctificati sunt sacerdotes et Levitæ. ¹¹Omnes filii captivitatis non sunt simul sanctificati, quia Levitæ omnes simul sanctificati sunt. ¹²Et immolaverunt Phase universi filii captivitatis, et fratribus suis sacerdotibus, et sibimetipsis. ¹³Et manducaverunt filii Israel, qui erant ex captivitate omnes qui remanserant ab omnibus execrationibus gentium terræ quærentes Dominum, ¹⁴et celebraverunt diem festum azymorum septem diebus epulantes in conspectu Domini, ¹⁵quoniam convertit consilium regis Assyriorum in eos, confortare manus eorum ad opera Domini Dei Israel.