3 Esdras 8

8¹Et post hunc regnante Artaxerxe Persarum rege, accessit Esdras filius Azariæ, filii Helciæ, filii Solome, ²filii Sadoc, filii Achitob, filii Ameri, filii Azahel, filii Bocci, filii Abisueve, filii Phinees, filii Eleazari, filii Aaron primi sacerdotis: ³hic Esdras ascendit de Babylonia, cum esset scriba et ingeniosus in lege Moysi, quæ data est a Domino Deo Israel docere et facere. ⁴Et dedit ei rex gloriam, quod invenisset gratiam in omni dignitate et desiderio in conspectu eius. ⁵Et ascenderunt simul cum ipso ex filiis Israel, et sacerdotibus et Levitis, et sacris cantoribus templi, et ostiariis, et servis templi in Ierusalem.

⁶Anno septimo regnante Artaxerxe, in quinto mense, hic annus septimus est regni, exeuntes de Babylonia novilunio quinti mensis, ⁷venerunt Ierosolymam iuxta præceptum illius secundum prosperitatem itineris a Domino ipsorum datam eis. ⁸In his enim Esdras magnam disciplinam obtinebat, ne prætermitteret quidquam eorum, quæ essent ex lege Domini et præceptis, et docendo universum Israel omnem iustitiam et iudicium.

⁹Accedentes autem, qui scribebant scripta Artaxerxis regis tradiderunt scriptum quod obvenerat ab Artaxerxe rege ad Esdram sacerdotem, et lectorem legis Domini, cuius exemplum subiectum est.

¹⁰REX Artaxerxes Esdræ sacerdoti, et lectori legis Domini salutem. ¹¹Humanior ego iudicans in beneficiis, præcepi eis qui desiderant ex gente Iudæorum sua sponte, et ex sacerdotibus et Levitis, qui sunt in regno meo, comitari tecum in Ierusalem. ¹²Si qui ergo cupiunt ire tecum, conveniant, et proficiscantur sicut placuit mihi et septem amicis meis consiliariis, ¹³ut visitent ea quæ aguntur secundum Iudæam et Ierusalem, observantes sicut habes in lege Domini, ¹⁴et ferant munera Domino Deo Israel, quæ vovi ego et amici Ierusalem, et omne aurum et argentum, quod inventum fuerit in regione Babyloniæ Domino in Ierusalem cum illo, ¹⁵quod est donatum pro ipsa gente in templum Domini eorum quod est in Ierusalem: ut colligatur hoc aurum et argentum ad tauros, et arietes, et agnos, et hœdos, et quæ his sunt congruentia, ¹⁶ut offerant hostias Domino super altare Domini ipsorum quod est in Ierusalem. ¹⁷Et omnia quæcumque volueris cum fratribus tuis facere auro et argento, perfice pro voluntate tua secundum præceptum Domini Dei tui: ¹⁸et sacrosancta vasa, quæ data sunt tibi ad opera domus Domini Dei tui, quæ est in Ierusalem: ¹⁹et cetera quæcumque tibi subvenerint ad opera templi Dei tui, dabis de regali gazophylacio: ²⁰cum volueris cum fratribus tuis facere auro et argento, perfice secundum voluntatem Domini. ²¹Et ego quidem rex Artaxerxes præcepi custodibus thesaurorum Syriæ et Phœnicis, ut quæcumque scripserit Esdras sacerdos, et lector legis Domini, diligenter detur ei usque ad argenti talenta centum, similiter et auri: ²²et usque ad frumenti modios centum, et vini amphoras centum, et alia quæcumque abundant sine taxatione. ²³Omnia secundum legem Dei fiant Deo altissimo, ne forte exurgat ira in regno regis, et filii, et filiorum eius. ²⁴Vobis autem dicitur, ut omnibus sacerdotibus et Levitis, et sacris cantoribus, et servis templi, et scribis templi huius, ²⁵nullum tributum, neque ulla alia indictio irrogetur, nec habeat quisquam potestatem obiicere eis quicquam. ²⁶Tu autem Esdra secundum sapientiam Dei constitue iudices et arbitros in tota Syria, et Phœnice: et omnes qui legem Dei tui non noverunt, doce: ²⁷ut quotquot transgressi fuerint legem, diligenter plectantur sive morte, sive cruciatu, sive etiam pecuniæ mulctatione vel abductione.

²⁸Et dixit Esdras scriba: Benedictus Deus patrum nostrorum, qui dedit hanc voluntatem in cor regis, clarificare domum suam, quæ est in Ierusalem, ²⁹et me honorificavit in conspectu regis, et consiliariorum, et amicorum, et purpuratorum eius. ³⁰et ego constans animo factus sum secundum opitulationem Domini Dei mei, et congregavi ex Israel viros, ut simul ascenderent mecum.

³¹Et hi sunt præpositi secundum suas patrias, et principatus portionales eorum qui mecum ascenderunt de Babylonia in regno Artaxerxis. ³²Et ex filiis Phares, Gersomus: ex filiis Siemarith, Amenus: filiorum David, Acchus filius Sceciliæ: ³³ex filiis Phares, Zacharias, et cum eo reversi sunt viri centum quinquaginta: ³⁴ex filiis ductoris Moabilionis Zaræi, et cum ipso viri ducenti quinquaginta: ³⁵ex filiis Zachues, lechonias Zecholei, et cum ipso viri ducenti quinquaginta: ³⁶ex filiis Sala, Maasias Gotholiæ, et cum ipso viri septuaginta: ³⁷ex filiis Saphatiæ, Zarias Micheli, et cum ipso viri octoginta: ³⁸ex filiis Iob, Abdias Ieheli, et cum ipso viri ducenti duodecim: ³⁹ex filiis Baniæ, Salimoth, filius Iosaphiæ, et cum ipso viri centum sexaginta: ⁴⁰ex filiis Beer, Zacharias Bebei, et cum ipso viri ducenti octo: ⁴¹ex filiis Ezead, Ioannes Eccetan, et cum ipso viri centum decem: ⁴²ex filiis Adonicam ipsis postremis, et hæc sunt nomina eorum, Eliphalam filius Gebel, et Semeias, et cum ipso viri septuaginta.

⁴³Et congregavi eos ad fluvium qui dicitur Thia, et metati fuimus illic triduo, et recognovi eos. ⁴⁴Et ex filiis sacerdotum et Levitarum non inveni illic. ⁴⁵Et misi ad Eleazarum, et Eccelon, et Masman, et Maloban, et Enaathan, et Samea, et Ioribum, Nathan, Enuagam, Zachariam, et Moso-lamum ipsos ductores et peritos: ⁴⁶et dixi eis ut venirent ad Loddeum, qui erat apud locum gazophylacii. ⁴⁷Et mandavi eis ut dicerent Loddeo, et fratribus eius, et illis qui erant in gazophylacio, ut mitterent nobis eos qui sacerdotio fungerentur in domo Domini Dei nostri: ⁴⁸et adduxerunt nobis secundum manum validam Domini Dei nostri viros peritos: ex filiis Moholi, filii Levi, filii Israel, Sebebian, et filios et fratres, qui erant decem et octo: ⁴⁹Asbiam, et Amin ex filiis filiorum Chananæi, et filii eorum viri viginti. ⁵⁰Et ex his qui templo serviebant, quos dedit David, et ipsi principes ad operationem Levitis templo servientium ducenti viginti. Omnia nomina significata sunt in scripturis.

⁵¹Et vovi illic ieiunium iuvenibus in conspectu Dei, ut quærerem ab eo bonum iter nobis, et qui nobiscum erant, et filiis, et pecoribus propter insidias. ⁵²Erubui enim petere a rege pedites et equites in comitatu, tutelæ gratia contra adversarios nostros. ⁵³Diximus enim regi, quoniam virtus Domini erit cum eis qui inquirunt eum in omni affectu. ⁵⁴Et iterum deprecati sumus Dominum Deum nostrum secundum hæc: quem et propitium habuimus, et compotes facti sumus Deo nostro.

⁵⁵Et separavi ex plebis præpositis, et sacerdotibus templi viros duodecim, et Sedebiam, et Asannam, et cum eis ex fratribus eorum viros decem: ⁵⁶et appendi eis aurum et argentum et vasa sacerdotalia domus Dei nostri, quæ donaverat rex, et consiliarii eius, et principes, et omnis Israel. ⁵⁷Et cum appendissem, tradidi argenti talenta centum quinquaginta, et vasa argentea talentorum centum, et auri talenta centum, ⁵⁸et vasorum aureorum septies viginti, et vasa ærea de bono æramento splendentia, duodecim, auri speciem reddentia. ⁵⁹et dixi eis: Et vos sancti estis Domino, et vasa sunt sancta, et aurum, et argentum votum est Domino Deo patrum nostrorum. ⁶⁰Vigilate et custodite, donec tradatis ex plebis præpositis, et sacerdotibus et Levitis, et principibus civitatum Israel in Ierusalem, in pastophorio domus Dei nostri. ⁶¹Et hi qui susceperunt sacerdotes et Levitæ aurum et argentum et vasa, intulerunt in Ierusalem in templum Domini.

⁶²Et promovimus a fluvio Thia, die duodecima mensis primi, usquequo introivimus in Ierusalem.

⁶³Et cum factus fuisset tertius dies, quarta autem die ponderatum aurum, et argentum traditum est in domo Domini Dei nostri, Marimoth filio Iori sacerdoti: ⁶⁴et cum ipso erat Eleazar filius Phinees: et erant cum ipsis Iosadus filius Iesu, et Medias, et Banni filius Levitæ ad numerum, et ad pondus universa. ⁶⁵Et scriptum est pondus ipsorum eadem hora.

⁶⁶Qui autem venerunt ex captivitate, obtulerunt sacrificium Domino Deo Israel, tauros duodecim pro omni Israel, arietes octoginta sex, ⁶⁷agnos septuagintaduos, hircos pro peccato duodecim, et pro salute vaccas duodecim, omnia in sacrificium Domini.

⁶⁸Et relegerunt præcepta regis regalibus dispensatoribus, et subregulis Cœlesyriæ, et Phœnicis: et honorificaverunt gentem, et templum Domini.

⁶⁹Et consummatis his, accesserunt ad me præpositi, dicentes: Non segregaverunt genus Israel, et principes, et sacerdotes, et Levitæ, ⁷⁰et alienigenæ gentes et nationes terræ immunditias suas a Chananæis, et Hethæis, et Pherezæis, et Iebuzæis, et Moabitis, et Ægyptiis, et Idumæis. ⁷¹coniuncti enim sunt filiabus eorum et ipsi, et filii eorum. et mistum est semen sanctum alienigenis gentibus terræ: et participes erant præpositi, et magistratus iniquitatis eius ab initio ipsius regni. ⁷²Et mox ut audivi ista, conscidi vestimenta et sacram tunicam: et lacerans capillos capitis, et barbam, sedi dolens et mœstus. ⁷³Et convenerunt quotquot tunc movebantur in verbo Domini Dei Israel, ad me lugentem super iniquitatem istam, et sedebam tristis usque ad sacrificium vespertinum.

⁷⁴Et consurgens a ieiunio, conscissa habens vestimenta et sacram tunicam, ingeniculans, et extendens manus ad Dominum, ⁷⁵dicebam: Domine confusus sum, et reveritus sum ante faciem tuam. ⁷⁶Peccata enim nostra multiplicata sunt super capita nostra, et iniquitates nostræ exaltatæ sunt usque ad cælum. ⁷⁷Quoniam a temporibus patrum nostrorum sumus in magno peccato usque ad diem hunc. ⁷⁸Et propter peccata nostra, et patrum nostrorum sumus traditi cum fratribus nostris, et cum sacerdotibus nostris, regibus terræ in gladium et captivitatem, et deprædationem cum confusione usque in hodiernum diem. ⁷⁹Et nunc quantum est hoc quod contigit nobis misericordia abs te Domine Deus, et relinque nobis radicem, et nomen in locum sanctificationis tuæ, ⁸⁰detegere luminare nostrum in domo Domini Dei nostri, dare nobis cibum in omni tempore servitutis nostræ. ⁸¹Et cum serviremus, non fuimus derelicti a Domino Deo nostro: sed constituit nos in gratia, ponens nobis reges Persarum dare cibum, ⁸²et clarificare…