3 Esdras 5

5¹Post hæc autem electi sunt, ut ascenderent principes pagorum per domos, et tribus suas, et uxores illorum, et filii et filiæ eorum, et servi et ancillæ ipsorum, et pecora eorum. ²Et Darius rex misit una cum eis equites mille, donec deducerent eos in Ierusalem cum pace, et cum musicis et cum tympanis et tibiis. ³et omnes fratres erant ludentes, et fecit eos ascendere simul cum eis. ⁴Et hæc sunt nomina virorum, qui ascenderunt per pagos suos in tribus, et in partem principatus ipsorum. ⁵Sacerdotes: Filii Phinees, filii Aaron, Iesus filius Iosedec, Ioacim filius Zorobabel filii Salathiel de domo David, ex progenie Phares, de tribu Iuda, ⁶qui locutus est sub Dario rege Persarum sermones mirificos in secundo anno regni ipsius mense Nisan primo.

⁷Sunt autem hi, qui ascenderunt ex Iudæa de captivitate transmigrationis, quos transmigravit Nabuchodonosor rex Babyloniæ in Babylonem, et reversus est in Ierusalem. ⁸Et requisivit partem Iudææ unusquisque in civitatem suam, qui venerunt cum Zorobabel, et Iesu, Nehemias, Areores, Elimeo, Emmanio, Mardocheo, Beelsuro, Mechpsatochor, Olioro. Emonia unus de principibus eorum.

⁹Et numerus a gentilibus eorum, ex præpositis eorum filii Phares, duo millia centum septuagintaduo: ¹⁰filii Ares, tria millia centum quinquagintaseptem: ¹¹filii Phœmo, centum quadraginta duo: in filiis Iesu et Ioabes, mille trecenti duo: ¹²filii Demu, duo millia quadringenti septuaginta: filii Choraba, ducentiquinque: filii Banica, centum sexagintaocto: ¹³filii Bebech, quadringentitres: filii Archad, quadringenti vigintiseptem: ¹⁴filii Cham, trigintaseptem: filii Zoroar, duo millia sexagintaseptem: filii Adin, quadringenti sexaginta unus: ¹⁵filii Aderectis, centum octo: filii Ciaso et Zelas, centum septem: filii Azoroc, quadringenti trigintanovem: ¹⁶filii Iedarbone, centum triginta duo: filii Ananiæ, centum triginta: filii Asoni, nonaginta: ¹⁷filii Marsar, quadringenti viginti duo: filii Zabarus, nonagintaquinque: filii Sepolemon, centum vigintitres: ¹⁸filii Nepopas, quinquagintaquinque: filii Nechanatus, centum quinquagintaocto: filii Cebethamus, centum trigintaduo: ¹⁹filii Crearpatros, qui Enocadies, et Modiæ, quadringenti vigintitres: qui ex Gramas et Gabea, centum viginti unus: ²⁰qui ex Besselon, et Ceagge, sexagintaquinque: qui ex Bastaro, centum vigintiduo: ²¹Qui ex Bechenobes, quinquagintaquinque: filii Liptis, centum quinquagintaquinque: filii Labonni, trecenti quinquagintaseptem: ²²filii Sichem, trecenti septuaginta: filii Suadon, et Cliomus, trecenti septuagintaocto: ²³filii Ericus, duo millia centum quadragintaquinque: filii Anaas, trecenti septuaginta.

Sacerdotes: ²⁴Filii Ieddus, filii Euther, filii Eliasib, trecenti septuagintaduo: filii Emerus, ducenti quinquagintaduo: ²⁵filii Phasurii, trecenti quinquagintaseptem: filii Caree, ducenti vigintiseptem.

²⁶Levitæ: Filii Iesu in Caduhel, et Bamis, et Serebias, et Edias, septuagintaquattuor. omnis numerus a duodecimo anno, triginta millia quadringenti sexagintaduo, ²⁷filii, et filiæ, et uxores, omnis computatio, quadraginta millia ducenti quadragintaduo. ²⁸Filii sacerdotum, qui psallebant in templo: filii Asaph, centum vigintiocto. ²⁹Ostiarii vero: filii Esmenni, filii Azer, filii Amon, filii Accuba, Topa filii Tobi, omnes centum trigintanovem.

³⁰Sacerdotes servientes in templo: filii Sel, filii Gaspha, filii Tobloch, filii Cariæ, filii Su, filii Hellu, filii Labana, filii Armacha, filii Accub, filii Utha, filii Cetha, filii Aggab, filii Obai, filii Anani, filii Canna, filii Geddu, ³¹filii An, filii Radin, filii Desanon, filii Nachoba, filii Caseba, filii Gaze, filii Ozui, filii Sinone, filii Attre, filii Hasten, filii Asiana, filii Manei, filii Nasissim, filii Accusu, filii Agista, filii Azui, filii Favon, filii Phasalon, ³²filii Meedda, filii Phusa, filii Caree, filii Barcus, filii Saree, filii Coesi, filii Nasith, filii Agisti, filii Pedon.

³³Salomon filii eius, filii Asophot, filii Phasida, filii Celi, filii Dedon, filii Gaddahel, filii Sephegi ³⁴filii Aggia, filii Sachareth, filii Sabathen, filii Caroneth, filii Malsith, filii Amæ, filii Sasus, filii Addus, filii Suba, filii Eura, filii Rahotis, filii Phasphat, filii Malmon. ³⁵Omnes sacro servientes, et pueri Salomonis, quadringenti octogintaduo.

³⁶Hi sunt filii qui ascenderunt a Thelmela, Telharsa: principes eorum, Carmellam, et Careth: ³⁷et non poterant edicere civitates suas, et progenies suas, quemadmodum sint ex Israel. Filii Dalari, filii Tubal, filii Nechodaici, ³⁸ex sacerdotibus, qui fungebantur sacerdotio: et non sunt inventi filii Obia, filii Achisos, filii Addin, qui accepit uxorem ex filiabus Phargeleu: ³⁹et vocati sunt nomine eius, et horum quæsita est generis scriptura in pædatura, et non est inventa, et prohibiti sunt sacerdotio fungi. ⁴⁰Et dixit illis Nehemias et Astharas, Ne participentur sancta, donec exurgat pontifex doctus in ostensionem et veritatem.

⁴¹Omnis autem Israel erat exceptis servis et ancillis, quadraginta duo millia trecenti quadraginta. ⁴²Servi horum et ancillæ, septem millia trecenti triginta septem. Cantores et cantatrices, ducenti sexagintaquinque. ⁴³Cameli, quadringenti trigintaquinque. Equi septem millia trigintasex. Muli, ducenta millia quadragintaquinque. Subiugalia, quinque millia vigintiquinque.

⁴⁴Et de præpositis ipsis per pagos, dum venirent in templum Dei, quod erat in Ierusalem, innovare et suscitare templum in loco suo, secundum suam virtutem: ⁴⁵et dari in templum thesaurum operum sacrum auri mnas duodecim millia, et mnas argenti quinque millia, et stolas sacerdotales centum.

⁴⁶Et habitaverunt Sacerdotes et Levitæ, et qui exierant de plebe in Ierusalem et in regione, et sacri cantores, et ostiarii, et omnis Israel in regionibus suis.

⁴⁷Instante autem septimo mense, cumque essent filii Israel unusquisque in suis rebus, convenerunt unanimes in atrium, quod erat ante ianuam Orientalem. ⁴⁸Et stantes Iesus filius Iosedec, et fratres eius sacerdotes, et Zorobabel filius Salathiel, et huius fratres, paraverunt altare, ⁴⁹ut offerrent super illud holocautomata, secundum quæ in libro Moysi hominis Dei scripta sunt. ⁵⁰Et convenerunt ibi ex aliis nationibus terræ, et erexerunt sacrarium in loco suo omnes gentes terræ, et offerebant hostias, et holocautomata Domino matutina. ⁵¹Et egerunt scenopegiam, et diem solemnem, sicut præceptum est in lege: et sacrificia quotidie, sicut oportebat: ⁵²et post hæc oblationes institutas, et hostias sabbathorum, et neomeniarum, et dierum solemnium omnium sanctificatorum. ⁵³Et quotquot vovebant Domino a neomenia septimi mensis, cœperunt hostias offerre Deo, et templum Domini nondum erat ædificatum.

⁵⁴Et dederunt pecuniam lapidariis et fabris, et potum et pabula cum gaudio. ⁵⁵Et dederunt carra Sidoniis, et Tyriis, ut transveherent illis de Libano trabes cedrinas, et facerent rates in Ioppe portu, secundum decretum quod scriptum erat eis a Cyro rege Persarum.

⁵⁶Et in secundo anno venientes in templum Dei in Ierusalem, mense secundo inchoavit Zorobabel filius Salathiel, et Iosue filius Iosedec, et fratres ipsorum, et sacerdotes et Levitæ, et omnes qui venerant de captivitate in Ierusalem: ⁵⁷et fundaverunt templum Dei novilunio secundi mensis secundi anni cum venissent in Iudæam et Ierusalem. ⁵⁸Et statuerunt Levitas a viginti annis, super opera Domini: et stetit Iesus et filius eius, et fratres omnes Levitæ conspirantes, et executores legis, facientes opera in domo Domini.

⁵⁹Et steterunt sacerdotes habentes stolas cum tubis: et Levitæ filii Asaph, habentes cymbala, ⁶⁰collaudantes Dominum, et benedicentes secundum David regem Israel. ⁶¹Et cantabant canticum Domino, quoniam dulcedo eius, et honor in sæcula super omnem Israel. ⁶²Et omnis populus tuba cecinerunt, et proclamaverunt voce magna, collaudantes Dominum in suscitatione domus Domini. ⁶³Et venerunt ex sacerdotibus et Levitis, et præsidentibus secundum pagos senioribus, qui viderant pristinam domum: ⁶⁴et ad huius ædificationem cum clamore et planctu magno, et multi cum tubis et gaudio magno: ⁶⁵in tantum ut populus non audiret tubas propter planctum populi. Turba enim erat tubis canens magnifice, ita ut longe audiretur.

⁶⁶Et audierunt inimici tribus Iudæ, et Beniamin, et venerunt scire quæ esset vox tubarum. ⁶⁷Et cognoverunt quoniam qui erant ex captivitate, ædificant templum Domino Deo Israel. ⁶⁸Et accedentes ad Zorobabel et Iesum, præpositos pagorum, dixerunt eis, Ædificabimus una vobiscum: ⁶⁹Similiter enim audivimus Dominum vestrum, et ipsi pariter incedimus a diebus Asbazareth regis Assyriorum, qui transmigravit nos huc. ⁷⁰Et dixit illis Zorobabel, et Iesus, et principes pagorum Israel, ⁷¹Non est nobis et vobis ædificare domum Dei nostri. nos enim soli ædificabimus Domino Israel secundum ea quæ præcepit nobis Cyrus rex Persarum. ⁷²Gentes autem terræ incumbentes his qui sunt in Iudæa, et levantes opus ædificationis et insidias, et populos adducentes prohibebant eos ædificare, ⁷³et aggressuras exercentes impedierunt, ne consummaretur ædificium omni tempore vitæ Cyri regis, et protraxerunt structuram per biennium usque ad Darii regnum.