3 Esdras 1

1¹Et fecit Iosias Pascha in Ierosolymis Domino, et immolavit Phase quarta decima luna primi mensis: ²statuens sacerdotes per vices dierum stolis amictos in templo Domini. ³et dixit Levitis sacris servis Israel, ut sanctificarent se Domino in positione sanctæ arcæ Domini, in domo, quam ædificavit Salomon filius David rex. ⁴Non erit vobis tollere super humeros eam. Et nunc deservite Domino vestro, et curam agite gentis illius Israel ex parte secundum pagos et tribus vestras, ⁵secundum scripturam David regis Israel, et secundum magnificentiam Salomonis filii eius, omnes in templo, et secundum particulam principatus paternam vestram eorum, qui stant in conspectu fratrum filiorum Israel. ⁶Immolate Pascha, et sacrificia parate fratribus vestris, et facite secundum præceptum Domini quod datum est Moysi. ⁷Et donavit Iosias in plebem, quæ inventa est, ovium, agnorum, et hœdorum, et caprarum triginta millia, vitulos tria millia. ⁸hæc de regalibus data sunt secundum promissionem populo: et sacerdotibus in Pascha, oves numero duo millia, ac vituli centum. ⁹Et Iechonias, et Semeias, et Nathanael fratres, et Hasabias, et Oziel, et Coraba in Phase, oves quinque millia, vitulos quingentos. ¹⁰Et hæc cum fierent eleganter, steterunt sacerdotes et Levitæ habentes azyma per tribus. ¹¹Et secundum partes principatus patrum in conspectu populi offerebant Domino, secundum ea quæ in libro Moysi scripta sunt: ¹²et assaverunt Phase igni prout oportebat: et hostias coxerunt in emolis, et in ollis cum benevolentia: ¹³et attulerunt omnibus qui erant ex plebe: et post hæc paraverunt sibi et sacerdotibus: ¹⁴Sacerdotes enim offerebant adipes, usque dum finita esset hora: et Levitæ paraverunt sibi, et fratribus suis, filiis Aaron. ¹⁵Et sacri cantores filii Asaph erant per ordinem secundum præceptum David, et Asaph, et Zacharias, et Ieddimus, qui erat a rege. ¹⁶Et ostiarii per singulas ianuas, ita ut non prævaricaretur unusquisque suam: fratres enim illorum paraverunt illis. ¹⁷Et consummata sunt quæ pertinebant ad sacrificium Domini. ¹⁸In illa die egerunt Phase, et offerebant hostias super Domini sacrificium, secundum præceptum regis Iosiæ. ¹⁹Et egerunt filii Israel, qui inventi sunt in tempore illo, Phase: et diem festum azymorum per dies septem: ²⁰et non est celebratum Phase tale in Israel, a temporibus Samuelis prophetæ: ²¹et omnes reges Israel non celebraverunt tale Pascha quale egit Iosias, et Sacerdotes, et Levitæ, et Iudæi, et omnis Israel, qui inventi sunt in commoratione Ierosolymis. ²²Octavo decimo anno, regnante Iosia celebratum est Phase.

²³Et directa sunt opera Iosiæ in conspectu Domini sui in corde pleno metuentis: ²⁴et quæ circa illum quidem conscripta sunt, in pristinis temporibus de eis, qui peccaverunt, quique irreligiosi fuerunt in Dominum præ omni gente, et qui non quæsierunt verba Domini super Israel.

²⁵Et post omnem actum hunc Iosiæ, ascendit Pharao rex Ægypti, veniens in Charcamis ab itinere super Euphratem, et exiit obviam illi Iosias. ²⁶Et misit rex Ægypti ad Iosiam, dicens: Quid mihi et tibi est rex Iudæ? ²⁷Non sum missus a Domino ut pugnem contra te: super Euphratem enim bellum meum est, festinans descende. ²⁸Et non est reversus Iosias super currum: sed expugnare eum conabatur, non attendens verbum prophetæ ex ore Domini: ²⁹sed constituit ad eum bellum in campo Mageddo. Et descenderunt principes ad regem Iosiam. ³⁰Et dixit rex pueris suis, Amovete me a prælio, infirmatus sum enim valde. Et statim amoverunt eum pueri ipsius de acie. ³¹Et ascendit super currum secundarium suum: et perveniens Ierosolymam, vita functus est, et sepultus est in paterno sepulchro. ³²Et in tota Iudæa lugebant Iosiam: et qui præsidebant, cum uxoribus lamentabant eum usque in hunc diem. Et datum est hoc fieri semper in omne genus Israel.

³³Hæc autem præscripta sunt in libro historiarum regum Iudæ: et singula gesta actus Iosiæ, et eius gloria et intellectus eius in lege Domini: quæque gesta sunt ab eo, et quæ non scripta sunt in libro regum Israel et Iudæ: ³⁴Et assumentes, qui erant ex gente Iechoniam filium Iosiæ, constituerunt regem pro Iosia patre suo, cum esset annorum trigintatrium.

³⁵Et regnavit super Israel mensibus tribus. Et amovit eum rex Ægypti, ne regnaret in Ierosolymis: ³⁶et mulctavit gentem argenti talenta centum, et auri talentum unum. ³⁷Et constituit rex Ægypti Ioacim fratrem ipsius, regem Iudæ et Ierusalem: ³⁸et alligavit magistratus Ioacim, et Zaracelem fratrem suum, et apprehendens reduxit in Ægyptum.

³⁹Annorum erat Ioacim vigintiquinque, cum regnare cœpisset in terra Iuda et Ierusalem: et fecit malum in conspectu Domini. ⁴⁰Post hunc autem ascendit Nabuchodonosor rex Babylonis, et alligans eum in æreo vinculo, perduxit in Babyloniam: ⁴¹et sacra vasa Domini accepit Nabuchodonosor, et tulit et consecravit in templo suo in Babylonia. ⁴²Nam de immunditia illius, et irreligiositate scriptum est in libro temporum regum. ⁴³Et regnavit Ioachin filius eius pro eo.

Cum autem constitutus esset rex, erat annorum decem et octo. ⁴⁴Regnavit autem menses tres, et dies decem in Ierusalem, et fecit malum in conspectu Domini: ⁴⁵et post annum mittens Nabuchodonosor, transmigravit eum in Babyloniam simul cum sacris vasis Domini.

⁴⁶Et constituit Sedeciam regem Iuda, et Ierusalem, cum esset annorum viginti unius: regnavit autem annis undecim. ⁴⁷Et fecit malum in conspectu Domini, et non est veritus a verbis, quæ dicta sunt ab Ieremia propheta ex ore Domini: ⁴⁸et adiuratus a rege Nabuchodonosor, periurans discessit: et indurata cervice sua, et corde suo, transgressus est legitima Domini Dei Israel.

⁴⁹Et duces populi Domini multa inique gesserunt, et impie egerunt super omnes immunditias gentium: et polluerunt templum Domini quod sanctum erat in Ierosolymis. ⁵⁰Et misit Deus patrum ipsorum per angelum suum revocare eos, propter quod parceret illis, et tabernaculo suo. ⁵¹Ipsi vero subsannabant in angelis suis: et qua die locutus est Dominus, erant illudentes prophetis eius.

⁵²Qui usque ad iracundiam concitatus est super gentem suam propter irreligiositatem suam, et præcepit ascendere reges Chaldæorum. ⁵³Hi occiderunt iuvenes eorum in gladio, in circuitu sancti templi eorum, et non pepercerunt iuveni, et seni, et virgini, et adolescenti: ⁵⁴sed omnes traditi sunt in manus ipsorum: et omnia sacra vasa Domini, et regales apothecas resumentes, tulerunt in Babyloniam, ⁵⁵et incenderunt domum Domini, et demolierunt muros Ierusalem: et turres eius incenderunt igne, ⁵⁶et consummaverunt omnia honorifica eius, et ad nihilum redegerunt, et reliquos a gladio duxerunt in Babylonem. ⁵⁷Et erant servi illius usque dum regnarent Persæ in repletione verbi Domini in ore Ieremiæ: ⁵⁸quousque benigne ageret terra sabbata sua, omni tempore desertionis suæ sabbatizavit in applicatione annorum septuaginta septem.