Psalm 83

¹In finem, pro torcularibus filiis Core. Psalmus.

²Quam dilecta tabernacula tua, Domine virtutum!

³Concupiscit, et deficit anima mea in atria Domini;

cor meum et caro mea exsultaverunt in Deum vivum.

⁴Etenim passer invenit sibi domum,

et turtur nidum sibi, ubi ponat pullos suos:

altaria tua, Domine virtutum,

rex meus, et Deus meus.

⁵Beati qui habitant in domo tua, Domine;

in sæcula sæculorum laudabunt te.

⁶Beatus vir cujus est auxilium abs te:

ascensiones in corde suo disposuit,

⁷in valle lacrimarum, in loco quem posuit.

⁸Etenim benedictionem dabit legislator;

ibunt de virtute in virtutem:

videbitur Deus deorum in Sion.

⁹Domine Deus virtutum, exaudi orationem meam;

auribus percipe, Deus Jacob.

¹⁰Protector noster, aspice, Deus,

et respice in faciem christi tui.

¹¹Quia melior est dies una in atriis tuis super millia;

elegi abjectus esse in domo Dei mei

magis quam habitare in tabernaculis peccatorum.

¹²Quia misericordiam et veritatem diligit Deus:

gratiam et gloriam dabit Dominus.

¹³Non privabit bonis eos qui ambulant in innocentia:

Domine virtutum, beatus homo qui sperat in te.