Psalm 32:16–22

¹⁶Non salvatur rex per multam virtutem,

et gigas non salvabitur in multitudine virtutis suæ.

¹⁷Fallax equus ad salutem;

in abundantia autem virtutis suæ non salvabitur.

¹⁸Ecce oculi Domini super metuentes eum,

et in eis qui sperant super misericordia ejus:

¹⁹ut eruat a morte animas eorum,

et alat eos in fame.

²⁰Anima nostra sustinet Dominum,

quoniam adjutor et protector noster est.

²¹Quia in eo lætabitur cor nostrum,

et in nomine sancto ejus speravimus.

²²Fiat misericordia tua, Domine, super nos,

quemadmodum speravimus in te.