Psalm 113:9–117:1

⁹Non nobis, Domine, non nobis,

sed nomini tuo da gloriam:

¹⁰super misericordia tua et veritate tua;

nequando dicant gentes:

Ubi est Deus eorum?

¹¹Deus autem noster in cælo;

omnia quæcumque voluit fecit.

¹²Simulacra gentium argentum et aurum,

opera manuum hominum.

¹³Os habent, et non loquentur;

oculos habent, et non videbunt.

¹⁴Aures habent, et non audient;

nares habent, et non odorabunt.

¹⁵Manus habent, et non palpabunt;

pedes habent, et non ambulabunt;

non clamabunt in gutture suo.

¹⁶Similes illis fiant qui faciunt ea,

et omnes qui confidunt in eis.

¹⁷Domus Israël speravit in Domino;

adjutor eorum et protector eorum est.

¹⁸Domus Aaron speravit in Domino;

adjutor eorum et protector eorum est.

¹⁹Qui timent Dominum speraverunt in Domino; adjutor eorum et protector eorum est.

²⁰Dominus memor fuit nostri,

et benedixit nobis.

Benedixit domui Israël;

benedixit domui Aaron.

²¹Benedixit omnibus qui timent Dominum,

pusillis cum majoribus.

²²Adjiciat Dominus super vos,

super vos et super filios vestros.

²³Benedicti vos a Domino,

qui fecit cælum et terram.

²⁴Cælum cæli Domino;

terram autem dedit filiis hominum.

²⁵Non mortui laudabunt te, Domine,

neque omnes qui descendunt in infernum:

²⁶sed nos qui vivimus, benedicimus Domino,

ex hoc nunc et usque in sæculum.

¹Alleluja.

Dilexi, quoniam exaudiet Dominus

vocem orationis meæ.

²Quia inclinavit aurem suam mihi,

et in diebus meis invocabo.

³Circumdederunt me dolores mortis;

et pericula inferni invenerunt me.

Tribulationem et dolorem inveni,

⁴et nomen Domini invocavi:

o Domine, libera animam meam.

⁵Misericors Dominus et justus,

et Deus noster miseretur.

⁶Custodiens parvulos Dominus;

humiliatus sum, et liberavit me.

⁷Convertere, anima mea, in requiem tuam,

quia Dominus benefecit tibi:

⁸quia eripuit animam meam de morte,

oculos meos a lacrimis,

pedes meos a lapsu.

⁹Placebo Domino in regione vivorum.

¹⁰Alleluja.

Credidi, propter quod locutus sum;

ego autem humiliatus sum nimis.

¹¹Ego dixi in excessu meo:

Omnis homo mendax.

¹²Quid retribuam Domino

pro omnibus quæ retribuit mihi?

¹³Calicem salutaris accipiam,

et nomen Domini invocabo.

¹⁴Vota mea Domino reddam

coram omni populo ejus.

¹⁵Pretiosa in conspectu Domini

mors sanctorum ejus.

¹⁶O Domine, quia ego servus tuus;

ego servus tuus, et filius ancillæ tuæ.

Dirupisti vincula mea:

¹⁷tibi sacrificabo hostiam laudis,

et nomen Domini invocabo.

¹⁸Vota mea Domino reddam

in conspectu omnis populi ejus;

¹⁹in atriis domus Domini,

in medio tui, Jerusalem.

¹Alleluja.

Laudate Dominum, omnes gentes;

laudate eum, omnes populi.

²Quoniam confirmata est super nos misericordia ejus,

et veritas Domini manet in æternum.

¹Alleluja.

Confitemini Domino, quoniam bonus,

quoniam in sæculum misericordia ejus.