Proverbs 1:24–31

²⁴Quia vocavi, et renuistis;

extendi manum meam, et non fuit qui aspiceret:

²⁵despexistis omne consilium meum,

et increpationes meas neglexistis.

²⁶Ego quoque in interitu vestro ridebo,

et subsannabo cum vobis id quod timebatis advenerit.

²⁷Cum irruerit repentina calamitas,

et interitus quasi tempestas ingruerit;

quando venerit super vos tribulatio et angustia:

²⁸tunc invocabunt me, et non exaudiam;

mane consurgent, et non invenient me:

²⁹eo quod exosam habuerint disciplinam,

et timorem Domini non susceperint,

³⁰nec acquieverint consilio meo,

et detraxerint universæ correptioni meæ.

³¹Comedent igitur fructus viæ suæ,

suisque consiliis saturabuntur.