Proverbs 1:1–7

¹Parabolæ Salomonis, filii David, regis Israël,

²ad sciendam sapientiam et disciplinam;

³ad intelligenda verba prudentiæ,

et suscipiendam eruditionem doctrinæ,

justitiam, et judicium, et æquitatem:

⁴ut detur parvulis astutia,

adolescenti scientia et intellectus.

⁵Audiens sapiens, sapientior erit,

et intelligens gubernacula possidebit.

⁶Animadvertet parabolam et interpretationem,

verba sapientum et ænigmata eorum.

⁷Timor Domini principium sapientiæ;

sapientiam atque doctrinam stulti despiciunt.