¹Nolite judicare, ut non judicemini. ²In quo enim judicio judicaveritis, judicabimini: et in qua mensura mensi fueritis, remetietur vobis. ³Quid autem vides festucam in oculo fratris tui, et trabem in oculo tuo non vides? ⁴aut quomodo dicis fratri tuo: Sine ejiciam festucam de oculo tuo, et ecce trabs est in oculo tuo? ⁵Hypocrita, ejice primum trabem de oculo tuo, et tunc videbis ejicere festucam de oculo fratris tui. ⁶Nolite dare sanctum canibus: neque mittatis margaritas vestras ante porcos, ne forte conculcent eas pedibus suis, et conversi dirumpant vos.

⁷Petite, et dabitur vobis: quærite, et invenietis: pulsate, et aperietur vobis. ⁸Omnis enim qui petit, accipit: et qui quærit, invenit: et pulsanti aperietur. ⁹Aut quis est ex vobis homo, quem si petierit filius suus panem, numquid lapidem porriget ei? ¹⁰aut si piscem petierit, numquid serpentem porriget ei? ¹¹Si ergo vos, cum sitis mali, nostis bona data dare filiis vestris: quanto magis Pater vester, qui in cælis est, dabit bona petentibus se?

¹²Omnia ergo quæcumque vultis ut faciant vobis homines, et vos facite illis. Hæc est enim lex, et prophetæ. ¹³Intrate per angustam portam: quia lata porta, et spatiosa via est, quæ ducit ad perditionem, et multi sunt qui intrant per eam. ¹⁴Quam angusta porta, et arcta via est, quæ ducit ad vitam: et pauci sunt qui inveniunt eam!

Read in Logos

Matthew 7:12: So whatever you wish that others would do to you, do also to them, for this is the Law and the Prophets.

Public Domain