¹Tunc Jesus ductus est in desertum a Spiritu, ut tentaretur a diabolo. ²Et cum jejunasset quadraginta diebus, et quadraginta noctibus, postea esuriit. ³Et accedens tentator dixit ei: Si Filius Dei es, dic ut lapides isti panes fiant. ⁴Qui respondens dixit: Scriptum est: Non in solo pane vivit homo, sed in omni verbo, quod procedit de ore Dei. ⁵Tunc assumpsit eum diabolus in sanctam civitatem, et statuit eum super pinnaculum templi, ⁶et dixit ei: Si Filius Dei es, mitte te deorsum. Scriptum est enim: Quia angelis suis mandavit de te, et in manibus tollent te, ne forte offendas ad lapidem pedem tuum. ⁷Ait illi Jesus: Rursum scriptum est: Non tentabis Dominum Deum tuum. ⁸Iterum assumpsit eum diabolus in montem excelsum valde: et ostendit ei omnia regna mundi, et gloriam eorum, ⁹et dixit ei: Hæc omnia tibi dabo, si cadens adoraveris me. ¹⁰Tunc dicit ei Jesus: Vade Satana: Scriptum est enim: Dominum Deum tuum adorabis, et illi soli servies. ¹¹Tunc reliquit eum diabolus: et ecce angeli accesserunt, et ministrabant ei.

Read in Logos

Matthew 4:2–3: And after fasting forty days and forty nights, he was hungry. And the tempter came and said to him, “If you are the Son of God, command these stones to become loaves of bread.”

Public Domain