Job 32:15–22

¹⁵Extimuerunt, nec responderunt ultra,

abstuleruntque a se eloquia.

¹⁶Quoniam igitur expectavi, et non sunt locuti:

steterunt, nec ultra responderunt:

¹⁷respondebo et ego partem meam,

et ostendam scientiam meam.

¹⁸Plenus sum enim sermonibus,

et coarctat me spiritus uteri mei.

¹⁹En venter meus quasi mustum absque spiraculo,

quod lagunculas novas disrumpit.

²⁰Loquar, et respirabo paululum:

aperiam labia mea, et respondebo.

²¹Non accipiam personam viri,

et Deum homini non æquabo.

²²Nescio enim quamdiu subsistam,

et si post modicum tollat me factor meus.