Jeremiah 4:5–9

⁵Annuntiate in Juda, et in Jerusalem auditum facite:

loquimini, et canite tuba in terra,

clamate fortiter, et dicite:

Congregamini, et ingrediamur civitates munitas.

⁶Levate signum in Sion;

confortamini, nolite stare:

quia malum ego adduco ab aquilone,

et contritionem magnam.

⁷Ascendit leo de cubili suo,

et prædo gentium se levavit:

egressus est de loco suo ut ponat terram tuam in solitudinem:

civitates tuæ vastabuntur,

remanentes absque habitatore.

⁸Super hoc accingite vos ciliciis;

plangite, et ululate:

quia non est aversa ira furoris Domini a nobis.

⁹Et erit in die illa, dicit Dominus:

peribit cor regis, et cor principum,

et obstupescent sacerdotes,

et prophetæ consternabuntur.