Isaiah 13:6–16

⁶Ululate, quia prope est dies Domini;

quasi vastitas a Domino veniet.

⁷Propter hoc omnes manus dissolventur,

et omne cor hominis contabescet,

⁸et conteretur.

Torsiones et dolores tenebunt;

quasi parturiens dolebunt:

unusquisque ad proximum suum stupebit,

facies combustæ vultus eorum.

⁹Ecce dies Domini veniet,

crudelis, et indignationis plenus, et iræ, furorisque,

ad ponendam terram in solitudinem,

et peccatores ejus conterendos de ea.

¹⁰Quoniam stellæ cæli, et splendor earum,

non expandent lumen suum;

obtenebratus est sol in ortu suo,

et luna non splendebit in lumine suo.

¹¹Et visitabo super orbis mala,

et contra impios iniquitatem eorum;

et quiescere faciam superbiam infidelium,

et arrogantiam fortium humiliabo.

¹²Pretiosior erit vir auro,

et homo mundo obrizo.

¹³Super hoc cælum turbabo;

et movebitur terra de loco suo,

propter indignationem Domini exercituum,

et propter diem iræ furoris ejus.

¹⁴Et erit quasi damula fugiens,

et quasi ovis, et non erit qui congreget.

Unusquisque ad populum suum convertetur,

et singuli ad terram suam fugient.

¹⁵Omnis qui inventus fuerit occidetur,

et omnis qui supervenerit cadet in gladio;

¹⁶infantes eorum allidentur in oculis eorum,

diripientur domus eorum, et uxores eorum violabuntur.