Isaiah 13:4–10

⁴Vox multitudinis in montibus,

quasi populorum frequentium;

vox sonitus regum,

gentium congregatarum.

Dominus exercituum præcepit

militiæ belli,

⁵venientibus de terra procul,

a summitate cæli;

Dominus, et vasa furoris ejus,

ut disperdat omnem terram.

⁶Ululate, quia prope est dies Domini;

quasi vastitas a Domino veniet.

⁷Propter hoc omnes manus dissolventur,

et omne cor hominis contabescet,

⁸et conteretur.

Torsiones et dolores tenebunt;

quasi parturiens dolebunt:

unusquisque ad proximum suum stupebit,

facies combustæ vultus eorum.

⁹Ecce dies Domini veniet,

crudelis, et indignationis plenus, et iræ, furorisque,

ad ponendam terram in solitudinem,

et peccatores ejus conterendos de ea.

¹⁰Quoniam stellæ cæli, et splendor earum,

non expandent lumen suum;

obtenebratus est sol in ortu suo,

et luna non splendebit in lumine suo.