Hosea 2:9–13

⁹Idcirco convertar, et sumam frumentum meum in tempore suo,

et vinum meum in tempore suo.

Et liberabo lanam meam et linum meum,

quæ operiebant ignominiam ejus.

¹⁰Et nunc revelabo stultitiam ejus in oculis amatorum ejus;

et vir non eruet eam de manu mea;

¹¹et cessare faciam omne gaudium ejus,

solemnitatem ejus, neomeniam ejus, sabbatum ejus,

et omnia festa tempora ejus.

¹²Et corrumpam vineam ejus, et ficum ejus,

de quibus dixit: Mercedes hæ meæ sunt,

quas dederunt mihi amatores mei;

et ponam eam in saltum,

et comedet eam bestia agri.

¹³Et visitabo super eam dies Baalim,

quibus accendebat incensum,

et ornabatur inaure sua, et monili suo.

Et ibat post amatores suos,

et mei obliviscebatur, dicit Dominus.