¹Postquam vero nonaginta et novem annorum esse cœperat, apparuit ei Dominus, dixitque ad eum: Ego Deus omnipotens: ambula coram me, et esto perfectus. ²Ponamque fœdus meum inter me et te, et multiplicabo te vehementer nimis. ³Cecidit Abram pronus in faciem. ⁴Dixitque ei Deus: Ego sum, et pactum meum tecum, erisque pater multarum gentium. ⁵Nec ultra vocabitur nomen tuum Abram, sed appellaberis Abraham: quia patrem multarum gentium constitui te. ⁶Faciamque te crescere vehementissime, et ponam te in gentibus, regesque ex te egredientur. ⁷Et statuam pactum meum inter me et te, et inter semen tuum post te in generationibus suis, fœdere sempiterno: ut sim Deus tuus, et seminis tui post te. ⁸Daboque tibi et semini tuo terram peregrinationis tuæ, omnem terram Chanaan in possessionem æternam, eroque Deus eorum.

⁹Dixit iterum Deus ad Abraham: Et tu ergo custodies pactum meum, et semen tuum post te in generationibus suis. ¹⁰Hoc est pactum meum quod observabitis inter me et vos, et semen tuum post te: circumcidetur ex vobis omne masculinum: ¹¹et circumcidetis carnem præputii vestri, ut sit in signum fœderis inter me et vos. ¹²Infans octo dierum circumcidetur in vobis, omne masculinum in generationibus vestris: tam vernaculus, quam emptitius circumcidetur, et quicumque non fuerit de stirpe vestra: ¹³eritque pactum meum in carne vestra in fœdus æternum. ¹⁴Masculus, cujus præputii caro circumcisa non fuerit, delebitur anima illa de populo suo: quia pactum meum irritum fecit.

Read in Logos

Genesis 17:7: And I will establish my covenant between me and you and your offspring after you throughout their generations for an everlasting covenant, to be God to you and to your offspring after you.

Public Domain