²²deorsum autem ad pedes mala punica ex hyacintho, purpura, vermiculo, ac bysso retorta: ²³et tintinnabula de auro purissimo, quæ posuerunt inter malogranata, in extrema parte tunicæ per gyrum: ²⁴tintinnabulum autem aureum, et malum punicum, quibus ornatus incedebat pontifex quando ministerio fungebatur, sicut præceperat Dominus Moysi. ²⁵Fecerunt et tunicas byssinas opere textili Aaron et filiis ejus: ²⁶et mitras cum coronulis suis ex bysso: ²⁷feminalia quoque linea, byssina: ²⁸cingulum vero de bysso retorta, hyacintho, purpura, ac vermiculo bis tincto, arte plumaria, sicut præceperat Dominus Moysi. ²⁹Fecerunt et laminam sacræ venerationis de auro purissimo, scripseruntque in ea opere gemmario, Sanctum Domini: ³⁰et strinxerunt eam cum mitra vitta hyacinthina, sicut præceperat Dominus Moysi.

³¹Perfectum est igitur omne opus tabernaculi et tecti testimonii: feceruntque filii Israël cuncta quæ præceperat Dominus Moysi.

Read in Logos

Public Domain