Exodus 24–31

24¹Moysi quoque dixit: Ascende ad Dominum tu, et Aaron, Nadab et Abiu, et septuaginta senes ex Israël, et adorabitis procul. ²Solusque Moyses ascendet ad Dominum, et illi non appropinquabunt: nec populus ascendet cum eo. ³Venit ergo Moyses et narravit plebi omnia verba Domini, atque judicia: responditque omnis populus una voce: Omnia verba Domini, quæ locutus est, faciemus. ⁴Scripsit autem Moyses universos sermones Domini: et mane consurgens, ædificavit altare ad radices montis, et duodecim titulos per duodecim tribus Israël. ⁵Misitque juvenes de filiis Israël, et obtulerunt holocausta, immolaveruntque victimas pacificas Domino, vitulos. ⁶Tulit itaque Moyses dimidiam partem sanguinis, et misit in crateras: partem autem residuam fudit super altare. ⁷Assumensque volumen fœderis, legit audiente populo: qui dixerunt: Omnia quæ locutus est Dominus, faciemus, et erimus obedientes. ⁸Ille vero sumptum sanguinem respersit in populum, et ait: Hic est sanguis fœderis quod pepigit Dominus vobiscum super cunctis sermonibus his.

⁹Ascenderuntque Moyses et Aaron, Nadab et Abiu, et septuaginta de senioribus Israël: ¹⁰et viderunt Deum Israël: et sub pedibus ejus quasi opus lapidis sapphirini, et quasi cælum, cum serenum est. ¹¹Nec super eos qui procul recesserant de filiis Israël, misit manum suam, videruntque Deum, et comederunt, ac biberunt. ¹²Dixit autem Dominus ad Moysen: Ascende ad me in montem, et esto ibi: daboque tibi tabulas lapideas, et legem, ac mandata quæ scripsi: ut doceas eos. ¹³Surrexerunt Moyses et Josue minister ejus: ascendensque Moyses in montem Dei, ¹⁴senioribus ait: Expectate hic donec revertamur ad vos. Habetis Aaron et Hur vobiscum: si quid natum fuerit quæstionis, referetis ad eos. ¹⁵Cumque ascendisset Moyses, operuit nubes montem, ¹⁶et habitavit gloria Domini super Sinai, tegens illum nube sex diebus: septimo autem die vocavit eum de medio caliginis. ¹⁷Erat autem species gloriæ Domini quasi ignis ardens super verticem montis in conspectu filiorum Israël. ¹⁸Ingressusque Moyses medium nebulæ, ascendit in montem: et fuit ibi quadraginta diebus, et quadraginta noctibus.

25¹Locutusque est Dominus ad Moysen, dicens: ²Loquere filiis Israël, ut tollant mihi primitias: ab omni homine qui offeret ultroneus, accipietis eas. ³Hæc sunt autem quæ accipere debeatis: aurum, et argentum, et æs, ⁴hyacinthum et purpuram, coccumque bis tinctum, et byssum, pilos caprarum, ⁵et pelles arietum rubricatas, pellesque janthinas, et ligna setim: ⁶oleum ad luminaria concinnanda: aromata in unguentum, et thymiamata boni odoris: ⁷lapides onychinos, et gemmas ad ornandum ephod, ac rationale. ⁸Facientque mihi sanctuarium, et habitabo in medio eorum: ⁹juxta omnem similitudinem tabernaculi quod ostendam tibi, et omnium vasorum in cultum ejus.

Sicque facietis illud: ¹⁰arcam de lignis setim compingite, cujus longitudo habeat duos et semis cubitos: latitudo, cubitum et dimidium: altitudo, cubitum similiter ac semissem. ¹¹Et deaurabis eam auro mundissimo intus et foris: faciesque supra, coronam auream per circuitum: ¹²et quatuor circulos aureos, quos pones per quatuor arcæ angulos: duo circuli sint in latere uno, et duo in altero. ¹³Facies quoque vectes de lignis setim, et operies eos auro. ¹⁴Inducesque per circulos qui sunt in arcæ lateribus, ut portetur in eis: ¹⁵qui semper erunt in circulis, nec umquam extrahentur ab eis. ¹⁶Ponesque in arca testificationem quam dabo tibi. ¹⁷Facies et propitiatorium de auro mundissimo: duos cubitos et dimidium tenebit longitudo ejus, et cubitum ac semissem latitudo. ¹⁸Duos quoque cherubim aureos et productiles facies, ex utraque parte oraculi. ¹⁹Cherub unus sit in latere uno, et alter in altero. ²⁰Utrumque latus propitiatorii tegant expandentes alas, et operientes oraculum, respiciantque se mutuo versis vultibus in propitiatorium quo operienda est arca, ²¹in qua pones testimonium quod dabo tibi. ²²Inde præcipiam, et loquar ad te supra propitiatorium, ac de medio duorum cherubim, qui erunt super arcam testimonii, cuncta quæ mandabo per te filiis Israël.

²³Facies et mensam de lignis setim, habentem duos cubitos longitudinis, et in latitudine cubitum, et in altitudine cubitum et semissem. ²⁴Et inaurabis eam auro purissimo: faciesque illi labium aureum per circuitum, ²⁵et ipsi labio coronam interrasilem altam quatuor digitis: et super illam, alteram coronam aureolam. ²⁶Quatuor quoque circulos aureos præparabis, et pones eos in quatuor angulis ejusdem mensæ per singulos pedes. ²⁷Subter coronam erunt circuli aurei, ut mittantur vectes per eos, et possit mensa portari. ²⁸Ipsos quoque vectes facies de lignis setim, et circumdabis auro ad subvehendam mensam. ²⁹Parabis et acetabula, ac phialas, thuribula, et cyathos, in quibus offerenda sunt libamina, ex auro purissimo. ³⁰Et pones super mensam panes propositionis in conspectu meo semper.

³¹Facies et candelabrum ductile de auro mundissimo, hastile ejus, et calamos, scyphos, et sphærulas, ac lilia ex ipso procedentia. ³²Sex calami egredientur de lateribus, tres ex uno latere, et tres ex altero. ³³Tres scyphi quasi in nucis modum per calamos singulos, sphærulaque simul, et lilium: et tres similiter scyphi instar nucis in calamo altero, sphærulaque simul et lilium. Hoc erit opus sex calamorum, qui producendi sunt de hastili: ³⁴in ipso autem candelabro erunt quatuor scyphi in nucis modum, sphærulæque per singulos, et lilia. ³⁵Sphærulæ sub duobus calamis per tria loca, qui simul sex fiunt procedentes de hastili uno. ³⁶Et sphærulæ igitur et calami ex ipso erunt, universa ductilia de auro purissimo. ³⁷Facies et lucernas septem, et pones eas super candelabrum, ut luceant ex adverso. ³⁸Emunctoria quoque, et ubi quæ emuncta sunt extinguantur, fiant de auro purissimo. ³⁹Omne pondus candelabri cum universis vasis suis habebit talentum auri purissimi. ⁴⁰Inspice, et fac secundum exemplar quod tibi in monte monstratum est.

26¹Tabernaculum vero ita facies: decem cortinas de bysso retorta, et hyacintho, ac purpura, coccoque bis tincto, variatas opere plumario facies. ²Longitudo cortinæ unius habebit viginti octo cubitos: latitudo, quatuor cubitorum erit. Unius mensuræ fient universa tentoria. ³Quinque cortinæ sibi jungentur mutuo, et aliæ quinque nexu simili cohærebunt. ⁴Ansulas hyacinthinas in lateribus ac summitatibus facies cortinarum, ut possint invicem copulari. ⁵Quinquagenas ansulas cortina habebit in utraque parte, ita insertas ut ansa contra ansam veniat, et altera alteri possit aptari. ⁶Facies et quinquaginta circulos aureos quibus cortinarum vela jungenda sunt, ut unum tabernaculum fiat. ⁷Facies et saga cilicina undecim, ad operiendum tectum tabernaculi. ⁸Longitudo sagi unius habebit triginta cubitos, et latitudo, quatuor: æqua erit mensura sagorum omnium. ⁹E quibus quinque junges seorsum, et sex sibi mutuo copulabis, ita ut sextum sagum in fronte tecti duplices. ¹⁰Facies et quinquaginta ansas in ora sagi unius, ut conjungi cum altero queat, et quinquaginta ansas in ora sagi alterius, ut cum altero copuletur. ¹¹Facies et quinquaginta fibulas æneas quibus jungantur ansæ, ut unum ex omnibus operimentum fiat. ¹²Quod autem superfuerit in sagis quæ parantur tecto, id est unum sagum quod amplius est, ex medietate ejus operies posteriora tabernaculi. ¹³Et cubitus ex una parte pendebit, et alter ex altera qui plus est in sagorum longitudine, utrumque latus tabernaculi protegens. ¹⁴Facies et operimentum aliud tecto de pellibus arietum rubricatis: et super hoc rursum aliud operimentum de janthinis pellibus. ¹⁵Facies et tabulas stantes tabernaculi de lignis setim, ¹⁶quæ singulæ denos cubitos in longitudine habeant, et in latitudine singulos ac semissem. ¹⁷In lateribus tabulæ, duæ incastraturæ fient, quibus tabula alteri tabulæ connectatur: atque in hunc modum cunctæ tabulæ parabuntur. ¹⁸Quarum viginti erunt in latere meridiano quod vergit ad austrum. ¹⁹Quibus quadraginta bases argenteas fundes, ut binæ bases singulis tabulis per duos angulos subjiciantur. ²⁰In latere quoque secundo tabernaculi quod vergit ad aquilonem, viginti tabulæ erunt, ²¹quadraginta habentes bases argenteas, binæ bases singulis tabulis supponentur. ²²Ad occidentalem vero plagam tabernaculi facies sex tabulas, ²³et rursum alias duas quæ in angulis erigantur post tergum tabernaculi. ²⁴Eruntque conjunctæ a deorsum usque sursum, et una omnes compago retinebit. Duabus quoque tabulis quæ in angulis ponendæ sunt, similis junctura servabitur. ²⁵Et erunt simul tabulæ octo, bases earum argenteæ sedecim, duabus basibus per unam tabulam supputatis. ²⁶Facies et vectes de lignis setim quinque ad continendas tabulas in uno latere tabernaculi, ²⁷et quinque alios in altero, et ejusdem numeri ad occidentalem plagam: ²⁸qui mittentur per medias tabulas a summo usque ad summum. ²⁹Ipsas quoque tabulas deaurabis, et fundes in eis annulos aureos per quos vectes tabulata contineant: quos operies laminis aureis. ³⁰Et eriges tabernaculum juxta exemplar quod tibi in monte monstratum est.

³¹Facies et velum de hyacintho, et purpura, coccoque bis tincto, et bysso retorta, opere plumario et pulchra varietate contextum: ³²quod appendes ante quatuor columnas de lignis setim, quæ ipsæ quidem deauratæ erunt, et habebunt capita aurea, sed bases argenteas. ³³Inseretur autem velum per circulos, intra quod pones arcam testimonii, quo et sanctuarium, et sanctuarii sanctuaria dividentur. ³⁴Pones et propitiatorium super arcam testimonii in Sancto sanctorum, ³⁵mensamque extra velum, et contra mensam candelabrum in latere tabernaculi meridiano: mensa enim stabit in parte aquilonis. ³⁶Facies et tentorium in introitu tabernaculi de hyacintho, et purpura, coccoque bis tincto, et bysso retorta, opere plumarii. ³⁷Et quinque columnas deaurabis lignorum setim, ante quas ducetur tentorium: quarum erunt capita aurea, et bases æneæ.

27¹Facies et altare de lignis setim, quod habebit quinque cubitos in longitudine, et totidem in latitudine, id est, quadrum, et tres…