Acts 8:5–17

⁵Philippus autem descendens in civitatem Samariæ, prædicabant illis Christum. ⁶Intendebant autem turbæ his quæ a Philippo dicebantur, unanimiter audientes, et videntes signa quæ faciebat. ⁷Multi enim eorum qui habebant spiritus immundos, clamantes voce magna exibant. Multi autem paralytici et claudi curati sunt. ⁸Factum est ergo gaudium magnum in illa civitate. ⁹Vir autem quidam nomine Simon, qui ante fuerat in civitate magus, seducens gentem Samariæ, dicens se esse aliquem magnum: ¹⁰cui auscultabant omnes a minimo usque ad maximum, dicentes: Hic est virtus Dei, quæ vocatur magna. ¹¹Attendebant autem eum: propter quod multo tempore magiis suis dementasset eos. ¹²Cum vero credidissent Philippo evangelizanti de regno Dei, in nomine Jesu Christi baptizabantur viri ac mulieres. ¹³Tunc Simon et ipse credidit: et cum baptizatus esset, adhærebat Philippo. Videns etiam signa et virtutes maximas fieri, stupens admirabatur.

¹⁴Cum autem audissent Apostoli qui erant Jerosolymis, quod recepisset Samaria verbum Dei, miserunt ad eos Petrum et Joannem. ¹⁵Qui cum venissent, oraverunt pro ipsis ut acciperent Spiritum Sanctum: ¹⁶nondum enim in quemquam illorum venerat, sed baptizati tantum erant in nomine Domini Jesu. ¹⁷Tunc imponebant manus super illos, et accipiebant Spiritum Sanctum.