Acts 13:30–37

³⁰Deus vero suscitavit eum a mortuis tertia die: qui visus est per dies multos his ³¹qui simul ascenderant cum eo de Galilæa in Jerusalem: qui usque nunc sunt testes ejus ad plebem. ³²Et nos vobis annuntiamus eam, quæ ad patres nostros repromissio facta est: ³³quoniam hanc Deus adimplevit filiis nostris resuscitans Jesum, sicut et in psalmo secundo scriptum est: Filius meus es tu, ego hodie genui te. ³⁴Quod autem suscitavit eum a mortuis, amplius jam non reversurum in corruptionem, ita dixit: Quia dabo vobis sancta David fidelia. ³⁵Ideoque et alias dicit: Non dabis sanctum tuum videre corruptionem. ³⁶David enim in sua generatione cum administrasset, voluntati Dei dormivit: et appositus est ad patres suos, et vidit corruptionem. ³⁷Quem vero Deus suscitavit a mortuis, non vidit corruptionem.