12 Alleluja.

Lauda, Jerusalem, Dominum;

lauda Deum tuum, Sion.

13 Quoniam confortavit seras portarum tuarum;

benedixit filiis tuis in te.

14 Qui posuit fines tuos pacem,

et adipe frumenti satiat te.

15 Qui emittit eloquium suum terræ:

velociter currit sermo ejus.

16 Qui dat nivem sicut lanam;

nebulam sicut cinerem spargit.

17 Mittit crystallum suam sicut buccellas:

ante faciem frigoris ejus quis sustinebit?

18 Emittet verbum suum, et liquefaciet ea;

flabit spiritus ejus, et fluent aquæ.

19 Qui annuntiat verbum suum Jacob,

justitias et judicia sua Israël.

20 Non fecit taliter omni nationi,

et judicia sua non manifestavit eis.

Alleluja.