28 Et erit post hæc:

effundam spiritum meum super omnem carnem,

et prophetabunt filii vestri et filiæ vestræ:

senes vestri somnia somniabunt,

et juvenes vestri visiones videbunt.

29 Sed et super servos meos et ancillas

in diebus illis effundam spiritum meum.

30 Et dabo prodigia in cælo et in terra,

sanguinem, et ignem, et vaporem fumi.

31 Sol convertetur in tenebras,

et luna in sanguinem,

antequam veniat dies Domini magnus et horribilis.

32 Et erit: omnis qui invocaverit nomen Domini, salvus erit:

quia in monte Sion et in Jerusalem

erit salvatio, sicut dixit Dominus,

et in residuis quos Dominus vocaverit.