3 Esdras 9

9¹Et exurgens Esdras ab ante atrium templi, abiit in pastophorium Ionathæ filii Nasabi, ²et hospitatus illic non gustavit panem, nec aquam bibit super iniquitatem multitudinis. ³Et facta est prædicatio in omni Iudæa, et in Ierusalem omnibus qui erant ex captivitate in Ierusalem congregati, ⁴ut quicumque non occurrerit biduo, vel triduo diei secundum iudicium assidentium seniorum, tollerentur facultates suæ, et ipse alienus iudicaretur a multitudine captivitatis.

⁵Et congregati sunt omnes qui erant ex tribu Iuda, et Beniamin in tribus diebus in Ierusalem. hic mensis est nonus, dies mensis vicesimus. ⁶Et sedit omnis multitudo in area templi trementes, propter hyemem præsentem. ⁷Et exurgens Esdras, dixit illis: Vos inique fecistis collocantes vobis in matrimonium uxores alienigenas, ut adderetis ad peccata Israel. ⁸Et nunc date confessionem, et magnificentiam Domino Deo patrum nostrorum: ⁹et perficite voluntatem ipsius, et discedite a gentibus terræ, et ab uxoribus alienigenis. ¹⁰Et clamavit omnis multitudo, et dixerunt voce magna: Sicut dixisti, faciemus. ¹¹Sed quoniam multitudo magna est, et tempus hybernum, et non possumus insubsidiati stare: et hoc opus non est nobis unius diei, neque bidui: multum enim in his peccavimus: ¹²stent præpositi multitudinis, et omnes qui nobiscum inhabitant, et quotquot habent uxores apud se alienigenas, ¹³et assistant accepto tempore ex omni loco presbyteri, et iudices usquequo solvant iram Domini negotii huius. ¹⁴Ionathas autem filius Ezeli, et Ozias Thecam susceperunt secundum hæc: et Bosoramus, et Levis, et Sabbathæus simul cooperati sunt cum illis. ¹⁵Et steterunt secundum hæc omnia universi qui erant ex captivitate. ¹⁶Et elegit sibi viros Esdras sacerdos principes magnos de patribus eorum secundum nomina: et consederunt novilunio mensis decimi examinare negotium istud. ¹⁷Et determinatum est de viris qui habebant uxores alienigenas, usque ad neomeniam primi mensis:

¹⁸et inventi sunt ex sacerdotibus permisti qui habebant alienigenas uxores. ¹⁹Ex filiis Iesu filii Iosedec, et fratribus eius: Maseas, et Eliozerus, et loribus, et Ioadeus, ²⁰et iniecerunt manus ut expellerent uxores suas: et ad litandum in exorationem, arietem pro ignorantia sua. ²¹et ex filiis Semmeri: Maseas et Esses et Ieelech, Azarias. ²²et ex filiis Fosere: Limosias, Hismaenis, et Nathanee, Iussio, Reddus, et Thalsas.

²³et ex Levitis: Iorabdus, et Semeis, et Colnis, et Calitas, et Facteas, et Colvas, et Elionas. ²⁴et ex sacris cantoribus, Eliasib, Zaccarus. ²⁵et ex ostiariis: Salumus, et Tolbanes.

²⁶et ex Israel: ex filiis Foro, Ozi, et Remias, et Geddias, et Melchias, et Michelus, Eleazarus, et Iammebias, et Bannas. ²⁷et ex filiis Iolaman: Chamas, et Zacharias, et Iezrelus, et Ioddius, et Erimoth, et Helias. ²⁸et ex filiis Zathoim. Eliadas, et Liasumus, Zochias, et Larimoth, et Zabdis, et Tebedias. ²⁹et ex filiis Zebes: Ioannes, et Amanias, et Zabdias, et Emeus. ³⁰et ex filiis Banni: Olamus, et Maluchus, et Ieddeus, et Iasub, et Azabus, et Ierimoth. ³¹et ex filiis Addin: Naathus, et Moosias, et Caleus, et Raanas, Maaseas, Mathathias, et Beseel, et Bonnus, et Manasses. ³²et ex filiis Nuæ: Noneas, et Aseas, et Melchias, et Sameas, et Simon, Beniamin, et Malchus, et Marras. ³³et ex filiis Asom: Carianeus, Mathathias, et Bannus, et Eliphalach, et Manasses, et Semei. ³⁴et ex filiis Banni: Ieremias, et Moadias, et Abramus, et Iohel, et Baneas, et Pelias, et Ionas, et Marimoth, et Eliasib, et Mathaneus, et Eliasis, et Orizas, et Dielus, et Semedius, et Zambris, et Iosephus. ³⁵et ex filiis Nobei: Idelus, et Mathathias, et Sabadus, et Zecheda, Sedmi, et Iessei, Baneas. ³⁶omnes isti coniunxerunt sibi uxores alienigenas, et dimiserunt eas cum filiis.

³⁷Et inhabitaverunt sacerdotes et Levitæ: et qui erant ex Israel in Ierusalem, et in tota una regione novilunio mensis septimi. Et erant filii Israel in commorationibus suis.

³⁸Et congregata est omnis multitudo simul in aream, quæ est ab oriente portæ sacræ: ³⁹et dixerunt Esdræ pontifici, et lectori, ut afferret legem Moysi, quæ tradita est a Domino Deo Israel. ⁴⁰Et attulit Esdras pontifex legem omni multitudini eorum a viro usque ad mulierem, et omnibus sacerdotibus audire legem novilunio mensis septimi. ⁴¹Et legebat in area, quæ est ante sacram portam templi, a prima luce usque ad vesperam coram viris et mulieribus. Et dederunt omnes sensum ad legem. ⁴²Et stetit Esdras sacerdos, et lector legis super ligneum tribunal quod fabricatum erat. ⁴³Et steterunt ad eum Mathathias, et Samus, Ananias, Azarias, Urias, Ezechias, et Balsamus ad dexteram: ⁴⁴et ad sinistram Faldeus, Misael, Malachias, Abusthas, Sabus, Nabadias, et Zacharias. ⁴⁵Et assumpsit Esdras librum coram omni multitudine: præsidebat enim in gloria in conspectu omnium. ⁴⁶Et cum absolvisset legem, omnes erecti steterunt: et benedixit Esdras Dominum Deum altissimum, Deum Sabaoth omnipotentem. ⁴⁷Et respondit omnis populus, Amen. Et elevatis sursum manibus procidentes in terram, adoraverunt Dominum. ⁴⁸Iesus, et Banæus, et Sarebias, et Iaddimus, et Accubus, et Sabbathæus, et Calithes, et Azarias, et Ioradus, et Ananias, et Philias Levitæ, ⁴⁹qui docebant legem Domini, et in multitudine legebant legem Domini, et præferebant singuli eos, qui intelligebant lectionem. ⁵⁰Et dixit Atharathes Esdræ pontifici, et lectori, et Levitis, qui docebant multitudinem, ⁵¹dicens. Dies hic sanctus est Domino. Et omnes flebant, cum audissent legem. ⁵²Et dixit Esdras, Digressi ergo manducate pinguissima quæque et bibite dulcissima quæque et mittite munera his qui non habent. ⁵³Sanctus enim est hic dies Domini, et nolite mœsti esse. Dominus enim clarificabit vos. ⁵⁴Et Levitæ denunciabant in publico omnibus, dicentes, Dies hic sanctus est, nolite mœsti esse. ⁵⁵Et abierunt omnes manducare, et bibere, et epulari, et dare munera his qui non habebant, ut epularentur. Magnifice enim sunt exaltati verbis quibus edocti sunt.

⁵⁶et congregati sunt universi in Ierusalem celebrare lætitiam, secundum testamentum Domini Dei Israel.