1 Corinthians 15:12–17

¹²Si autem Christus prædicatur quod resurrexit a mortuis, quomodo quidam dicunt in vobis, quoniam resurrectio mortuorum non est? ¹³Si autem resurrectio mortuorum non est: neque Christus resurrexit. ¹⁴Si autem Christus non resurrexit, inanis est ergo prædicatio nostra, inanis est et fides vestra: ¹⁵invenimur autem et falsi testes Dei: quoniam testimonium diximus adversus Deum quod suscitaverit Christum, quem non suscitavit, si mortui non resurgunt. ¹⁶Nam si mortui non resurgunt, neque Christus resurrexit. ¹⁷Quod si Christus non resurrexit, vana est fides vestra: adhuc enim estis in peccatis vestris.