Zechariah 9:2–6

2 Emath quoque in terminis ejus, et Tyrus, et Sidon:

assumpserunt quippe sibi sapientiam valde.

3 Et ædificavit Tyrus munitionem suam,

et coacervavit argentum quasi humum,

et aurum ut lutum platearum.

4 Ecce Dominus possidebit eam:

et percutiet in mari fortitudinem ejus,

et hæc igni devorabitur.

5 Videbit Ascalon, et timebit,

et Gaza, et dolebit nimis,

et Accaron, quoniam confusa est spes ejus:

et peribit rex de Gaza,

et Ascalon non habitabitur.

6 Et sedebit separator in Azoto,

et disperdam superbiam Philisthinorum.