Titus 2:4–10

⁴ut prudentiam doceant adolescentulas, ut viros suos ament, filios suos diligant, ⁵prudentes, castas, sobrias, domus curam habentes, benignas, subditas viris suis, ut non blasphemetur verbum Dei. ⁶Juvenes similiter hortare ut sobrii sint. ⁷In omnibus teipsum præbe exemplum bonorum operum, in doctrina, in integritate, in gravitate, ⁸verbum sanum, irreprehensibile: ut is qui ex adverso est, vereatur, nihil habens malum dicere de nobis. ⁹Servos dominis suis subditos esse, in omnibus placentes, non contradicentes, ¹⁰non fraudantes, sed in omnibus fidem bonam ostendentes: ut doctrinam Salvatoris nostri Dei ornent in omnibus.