Numbers 35:19–27

¹⁹Propinquus occisi, homicidam interficiet: statim ut apprehenderit eum, interficiet. ²⁰Si per odium quis hominem impulerit, vel jecerit quippiam in eum per insidias: ²¹aut cum esset inimicus, manu percusserit, et ille mortuus fuerit: percussor homicidii reus erit: cognatus occisi statim ut invenerit eum, jugulabit. ²²Quod si fortuitu, et absque odio ²³et inimicitiis quidquam horum fecerit, ²⁴et hoc audiente populo fuerit comprobatum, atque inter percussorem et propinquum sanguinis quæstio ventilata: ²⁵liberabitur innocens de ultoris manu, et reducetur per sententiam in urbem, ad quam confugerat, manebitque ibi, donec sacerdos magnus, qui oleo sancto unctus est, moriatur. ²⁶Si interfector extra fines urbium, quæ exulibus deputatæ sunt, ²⁷fuerit inventus, et percussus ab eo qui ultor est sanguinis: absque noxa erit qui eum occiderit.