¹In diebus autem illis venit Joannes Baptista prædicans in deserto Judææ, ²et dicens: Pœnitentiam agite: appropinquavit enim regnum cælorum. ³Hic est enim, qui dictus est per Isaiam prophetam dicentem:

Vox clamantis in deserto:

Parate viam Domini;

rectas facite semitas ejus.

⁴Ipse autem Joannes habebat vestimentum de pilis camelorum, et zonam pelliceam circa lumbos suos: esca autem ejus erat locustæ, et mel silvestre. ⁵Tunc exibat ad eum Jerosolyma, et omnis Judæa, et omnis regio circa Jordanem; ⁶et baptizabantur ab eo in Jordane, confitentes peccata sua. ⁷Videns autem multos pharisæorum, et sadducæorum, venientes ad baptismum suum, dixit eis: Progenies viperarum, quis demonstravit vobis fugere a ventura ira? ⁸Facite ergo fructum dignum pœnitentiæ. ⁹Et ne velitis dicere intra vos: Patrem habemus Abraham. Dico enim vobis quoniam potens est Deus de lapidibus istis suscitare filios Abrahæ. ¹⁰Jam enim securis ad radicem arborum posita est. Omnis ergo arbor, quæ non facit fructum bonum, excidetur, et in ignem mittetur. ¹¹Ego quidem baptizo vos in aqua in pœnitentiam: qui autem post me venturus est, fortior me est, cujus non sum dignus calceamenta portare: ipse vos baptizabit in Spiritu Sancto, et igni. ¹²Cujus ventilabrum in manu sua: et permundabit aream suam: et congregabit triticum suum in horreum, paleas autem comburet igni inextinguibili.

Read in Logos

Public Domain