Matthew 27:15–31

¹⁵Per diem autem solemnem consueverat præses populo dimittere unum vinctum, quem voluissent: ¹⁶habebat autem tunc vinctum insignem, qui dicebatur Barabbas. ¹⁷Congregatis ergo illis, dixit Pilatus: Quem vultis dimittam vobis: Barabbam, an Jesum, qui dicitur Christus? ¹⁸Sciebat enim quod per invidiam tradidissent eum. ¹⁹Sedente autem illo pro tribunali, misit ad eum uxor ejus, dicens: Nihil tibi, et justo illi: multa enim passa sum hodie per visum propter eum. ²⁰Principes autem sacerdotum et seniores persuaserunt populis ut peterent Barabbam, Jesum vero perderent. ²¹Respondens autem præses, ait illis: Quem vultis vobis de duobus dimitti? At illi dixerunt: Barabbam. ²²Dicit illis Pilatus: Quid igitur faciam de Jesu, qui dicitur Christus? ²³Dicunt omnes: Crucifigatur. Ait illis præses: Quid enim mali fecit? At illi magis clamabant dicentes: Crucifigatur. ²⁴Videns autem Pilatus quia nihil proficeret, sed magis tumultus fieret: accepta aqua, lavit manus coram populo, dicens: Innocens ego sum a sanguine justi hujus: vos videritis. ²⁵Et respondens universus populus, dixit: Sanguis ejus super nos, et super filios nostros. ²⁶Tunc dimisit illis Barabbam: Jesum autem flagellatum tradidit eis ut crucifigeretur.

²⁷Tunc milites præsidis suscipientes Jesum in prætorium, congregaverunt ad eum universam cohortem: ²⁸et exuentes eum, chlamydem coccineam circumdederunt ei, ²⁹et plectentes coronam de spinis, posuerunt super caput ejus, et arundinem in dextera ejus. Et genu flexo ante eum, illudebant ei, dicentes: Ave rex Judæorum. ³⁰Et exspuentes in eum, acceperunt arundinem, et percutiebant caput ejus. ³¹Et postquam illuserunt ei, exuerunt eum chlamyde, et induerunt eum vestimentis ejus, et duxerunt eum ut crucifigerent.